ეროვნული ბანკის კვლევის თანახმად, 2021 წლის მესამე კვარტალში, წინა კვარტალთან შედარებით, ბიზნეს სესხებზე მოთხოვნა გაიზარდა.
2021 წლის სექტემბერში, ივნისთან შედარებით, კორპორატიული სესხების წლიური ზრდის ტემპი 31%-მდე გაიზარდა, ხოლო მცირე და საშუალო ბიზნესს სესხების ზრდა მცირედით შემცირდა და 20% შეადგინა.
აღსანიშნავია, რომ სესხები განსაკუთრებით ეროვნულ ვალუტაში გაიზარდა. კვლევის თანახმად ბიზნეს სესხების ზრდა სექტორულ ჭრილში დიდ წილად სოფლის მეურნეობის, ვაჭრობისა და ტრანსპორტის და კავშირგაბმულობის სექტორების დაკრედიტებამ განაპირობა.
მესამე კვარტალში, წინა კვარტალთან შედარებით, საპროცენტო განაკვეთი ეროვნული ვალუტით გაცემული ბიზნეს სესხებისთვის მცირედით გაიზარდა. კერძოდ, სექტემბერში ეროვნული ვალუტით გაცემულ მსხვილ ბიზნეს სესხებზე საპროცენტო განაკვეთმა 13.4% შეადგინა. რაც შეეხება უცხოური ვალუტით გაცემულ სესხებს, სექტემბერში ივნისთან შედარებით, ევროთი გაცემული კორპორატიული სესხებისთვის საპროცენტო განაკვეთი თვის შიგნით გაცემულ სესხებზე 2.3 პროცენტული პუნქტით, 5.3%-მდე, შემცირდა, ხოლო დოლარით გაცემული სესხებისთვის მნიშვნელოვნად არ შეცვლილა და 7.3% შეადგინა.
აღსანიშნავია ასევე, რომ მესამე კვარტალში, წინა კვარტალთან შედარებით, უმოქმედო სესხების წილი ჯამურად ბიზნეს სესხებში, 7%-მდე, შემცირდა, რაც პორტფელის ზრდასა და ზოგიერთი კომპანიის ფინანსური მდგომარეობის გაუმჯობესებას უკავშირდება.
რაც შეეხება ფიზიკური პირების დაკრედიტების პირობებს და ტენდენციებს, ეროვნული ბანკის მონაცემებით, სექტემბერში ივნისთან შედარებით, ფიზიკურ პირებზე გაცემული სესხების წლიური ზრდის ტემპი არ შეცვლილა და 15.9% შეადგინა.
ვალუტების ჭრილში ფიზიკურ პირებზე გაცემული სესხების ზრდა მნიშვნელოვანწილად ეროვნული ვალუტით გაცემულმა სესხებმა განაპირობა, თუმცა მესამე კვარტალში დაჩქარდა უცხოური ვალუტით დაკრედიტება. საბანკო სექტორის წარმომადგენლები მომდევნო კვარტალში ფიზიკურ პირებზე გაცემულ სესხებზე მოთხოვნის ზრდას მოელიან.
აღსანიშნავია, რომ ეროვნული ვალუტით გაცემული იპოთეკური სესხების საპროცენტო განაკვეთი, სექტემბერში, ივნისთან შედარებით, მნიშვნელოვნად არ შეცვლილა და 12% შეადგინა, ხოლო საცალო სესხებისთვის საპროცენტო განაკვეთი მცირედით, 18.2%-მდე, გაიზარდა. საპროცენტო განაკვეთი აშშ დოლარით გაცემული იპოთეკური სესხებისთვის 0.2 პროცენტული პუნქტით, 5%-მდე, შემცირდა, ხოლო ევროთი გაცემული სესხებისთვის მცირედით, 4.3%-მდე, შემცირდა. სებ-ის ინფორმაციით, მომდევნო კვარტალში სამომხმარებლო და უცხოური ვალუტით გაცემული იპოთეკური სესხების საპროცენტო პირობების მცირედი შერბილებაა მოსალოდნელი.
წყარო: businessformula.ge