კორონავირუსის საწინააღმდეგო ვაქცინაციის კამპანიას ბიზნესი აქტიურად უერთდება. დამსაქმებლები თანამშრომლების წახალისებას სხვადასხვა ღონისძიების ფარგლებში ცდილობენ.  მათი მიზანია ვაქცინაციის პროცესის გააქტიურების ხელშეწყობა, რისთვისაც ვაქცინირებულ ადამიანებს გარკვეულ ბენეფიტებს სთავაზობენ. თუმცა, საუბრობენ იმაზეც, რომ ვაქცინაციის მხარდაჭერა არავაქცინირებული თანამშრომლების შეზღუდვას არ ითვალისწინებს.

,,რესტორატორთა ასოციაციის“  წამახალისებელი აქცია თანამშრომლებისა გარდა, მომხმარებლებსაც შეეხება. როგორც ასოციაციის დამფუძნებელი შოთა ბურჯანაძე ამბობს,  ვაქცინირებული კლიენტები მიიღებენ ფასდაკლებას, ხოლო  თანამშრომლებს ხელფასის სახით დანამატი გადაეცემათ.

,,სტუმარი ვაქცინაციის დამადასტურებელი ფურცლის ან სმს-ის წარდგენის შემთხვევაში, ბენეფიტს მიიღებს. ვფიქრობთ, ეს იქნება მცირე დამატებითი სტიმული  ადამიანებისთვის, რათა აიცრან. სხვა გამოსავალი არც არის, რადგან მძიმე კოვიდსიტუაციაა ქვეყანაში. სამწუხაროდ, საზოგადოებისთვის ვაქცინაციისაკენ მოწოდების საჭიროებაა. პირადად  ჩემი გადაწყვეტილებაა და არა „რესტორატორთა ასოციაციის“, რომ ადამიანები, რომლებიც მოვლენ ჩემს რესტორანში - Steakhouse#1 და არიან ვაქცინირებულები, მიიღებენ ფასდაკლებას, ასევე თანამშრომლები, რომლებიც ვაქცინირებულები არიან ხელფასის სახით მიიღებენ დანამატს. ამ ინიციატივას, ალბათ, სხვა ბიზნეს-ოპერატორებისგან მოჰყვება მხარდაჭერა, რომ ვაქცინირებულ ადამიანებს გარკვეული ბენეფიტი მიენიჭოთ. ამ შემთხვევაში ეს გადაწყვეტილება არ არის არავაქცინირებულის რაღაც კუთხით შეზღუდვა, უბრალოდ, ბენეფიტით ვერ ისარგებლებს“, - აცხადებს შოთა ბურჯანაძე.

„ჯი თი სმარტ სოლოუშენის“ დირექტორის ლევან გოგსაძის განცხადებით, თანამშრომლების უმეტესობა აცრილია, ან უახლოეს პერიოდში ჩაერთვება პროცესში.

„სპეციალურ პრიზს არ ვაწესებთ, თითქმის ყველა თანამშრომელი მოტივირებულია, რომ ვაქცინაციის პროცესში ჩაერთოს. ასეც უნდა იყოს, აცრას დღეს ალტერნატივა არ აქვს, ხოლო  საკუთარ და ახლობელთა ჯანმრთელობაზე ზრუნვა სტიმულის გარეშეც უნდა შეგვეძლოს. საჭიროება რომ დაგვენახა, ალბათ, წამოვიწყებდით რაიმე ღონისძიებას, მეტ მოტივაციას შევქმნიდით, მაგრამ კარგია, რომ ვაქცინაციას გარკვეული ჯგუფები დიდი პასუხისმგებლობით ეკიდებიან“, - აცხადებს ლევან გოგსაძე.

კომპანია „ვისოლი“ ახალი წამახალისებელი აქციის დაწყებას უახლოეს დღეებში აპირებს. ბენეფიტი ამ შემთხვევაში ფულადი პრიზია, რომელიც ყოველ აცრილ თანამშრომელს გადაეცემა.   

„ვაქცინაციას დღეს ალტერნატივა არ აქვს. ვცდილობეთ, მაქსიმალურად მხარი დავუჭიროთ იმ ადამიანებს, რომლებიც უკვე აიცრნენ და ასევე მივცეთ დანარჩენებსაც მოტივაცია. ამ მიზნით ,,ვისოლმა“ ახალი კამპანია წამოიწყო. გადავწყვიტტთ, ფულადი პრიზები გავცეთ. სავარაუდოდ, რამდენიმე ათეული თანამშრომელი აიცრება. უკვე დაწყებულია პროცესი, ინფორმაცია მიწოდებული გვაქვს და ცოტა ხანში შეძლებენ ამ ბენეფიტით სარგებლობას“, - ამბობს „კომერსანტთან“ რუსუდან კბილაშვილი, კომპანია „ვისოლის“ კორპორაციული პასუხისმგებლობის მენეჯერი.

11 აგვისტოს მონაცემებით, ბოლო 24 საათის განმავლობაში საქართველოში გამოვლინდა ვირუსით ინფიცირების 5 352 ახალი დადასტურებული შემთხვევა. გარდაიცვალა 48 კოვიდინფიცირებული პაციენტი.

მარი ჩიტაია