დღეს ბიზნესისა და ტექნოლოგიების აკადემიაში „HR ფორუმი - ადამიანური რესურსების მნიშვნელობა და შრომითი უფლებების დაცვის სტანდარტი“ გაიხსნება, რომელსაც „საქართველოს ადვოკატები დამოუკიდებელი პროფესიისათვის“ და ბიზნესისა და ტექნოლოგიების აკადემია ერთობლივად ახორციელებს.
ფორუმზე საუბარი იქნება ადამიანური რესურსების მნიშვნელობაზე, ადამიანური რესურსების შერჩევის ტექნიკაზე, კანონმდებლობისა და სასამართლო პრაქტიკის საფუძველზე დადგენილ შრომითი უფლებების დაცვის სტანდარტებსა და სხვა მნიშვნელოვან თემებზე.
„ფორუმზე 100-ზე მეტი დაინტერესებული პირია რეგისტრირებული. რაც იმას ნიშნავს, რომ თემა ძალიან აქტუალურია. ადამიანური რესურსები ძალიან დიდი კაპიტალია ნებისმიერი ორგანიზაციისთვის, განსაკუთრებით საგანმანათლებლო დაწესებულისთვის, რადგან ადამიანური რესურსების მართვას და შრომითი უფლებების დაცვას მათ კანონი ავალდებულებს,“ განაცხადა რადიო „კომერსანტის“ ეთერში ბიზნესისა და ტექნოლოგიების აკადემიის რექტორმა სოფიო მაჭარაშვილმა.
ფორუმში მონაწილეობენ: საქართველოს ადვოკატთა ასოციაციის წევრები, პრაქტიკოსი იურისტები, ადამიანური რესურსების მართვის მენეჯერები, საგანმანათლებლო დაწესებულებათა ავტორიზაციისა და საგანმანათლებლო პროგრამების აკრედიტაციის ექსპერტები და ა.შ.
ფორუმის მეორე ნაწილში მომხსენებლები შეეხებიან ადამიანური რესურსის შერჩევის ტექნიკას და სპეციფიკას, მათ შორის, ინტერვიუების ეტაპებსა და პოტენციური დასაქმებულის ინფორმირების სტანდარტს.
ღონისძიების მესამე ნაწილი შრომითი უფლების დაცვაზე საუბრებს დაეთმობა, რომელსაც ორი მოქმედი მოსამართლე - ხატია არდაზიშვილი და თამარ ხაჟომია უხელმძღვანელებენ.
მოამზადა მაკა ბიბილაშვილმა
HR ფორუმი
