ქართველი ბიზნესმენის ლევან კაჭარავს მკვლელობიდან თითქმის 7 თვე გავიდა და გამოძიება წინ არ წასულა.
„კომერსანტის“ ინფორმაციით, განზრახ მკვლელობის (108-ე მუხლი) და ცეცხლსასროლი იარაღის მართლსაწინააღმდეგო ტარების (236-ე) მუხლებით აღძრულ საქმეზე გამოძიება კი მიმდინარეობს, მაგრამ ხელშესახები წინსვლა არაა.
შეგახსენებთ, ბინზესმენი წყნეთის გზაზე საკუთარ მანქანაში 2022 წლის 24 ივნისს მაშინ მოკლეს, როცა ის საკუთარ სახლში ბრუნდებოდა. დაღუპული ბინესმენის დედა აცხადებდა, რომ მისი შვილი დაქირავებულმა ქილერმა მოკლა და მკვლელმა საქართველო მალევე დატოვა.
მკვლელობის პირველივე დღეებიდან მედიაში რამდენიმე ვერსია გავრცელდა. საუბრობდნენ იმაზე, რომ ეს შეკვეთილი მკვლელობა იყო. ერთ-ერთ ყველაზე რეალურ მოტივად ლევან კაჭარავას, მის ბიზნესპარტნიორებსა და ყაზახეთის ბიზნეს-სტრუქტურებს შორის დავა განიხილებოდა. ამ დავაში კაჭარავამ და მისმა პარტნიორებმა გაიმარჯვეს.
მეორე ვერსია უკავშირდებოდა ლევან კაჭარავას დაპირისპირებას ოთარ ფარცხალაძესთან და ძმებ მიქაძეებთან. რამდენიმე მედიაში გავრცელებული ინფორმაციით, საქმე ეხებოდა მიწის ნაკვეთს ბაგებში, რომლის დათმობასაც მისგან ხელისუფასთან დაახლოებული კრიმინალური დაჯგუფება ითხოვდა.
7 თვის წინ გავრცელდა კიდევ ერთი ვერსია, რომელმაც ლევან კაჭარავას მკვლელობა ნიკო კვარაცხელიას მკვლელობასთან დააკავშირა. ვერსიის თანახმად ლევან კაჭარავა კვარაცხელიას მკვლელობის სავარაუდო დამკვეთებს დამალვასა და დანაშაულის დაფარვაში ეხმარებოდა. ამ ვერსიას ნიკო კვარაცხელიას ოჯახი მალევე გამოეხმაურა და კატეგორიულად გამორიცხა კვარაცხელიას ოჯახის კავშირი შურისძიებასთან და კაჭარავას კავშირი მათ ოჯახთან.
შეგახსენებთ, რომ ლევან კაჭარავა შპს „ჯორჯიან ტრანზოილის“ დამფუძნებელი იყო. 1995–1996 წლებში გიორგი რამიშვილთან ერთად ახალი კომპანია Silk Road Group-ი დააფუძნა.
2006 წლიდან კაჭარავა Silk Road Group-ს გამოეყო და კომპანიების ჯგუფი MULTIPLEX-ი დააარსა, რომლის ძირითადი საქმიანობის სფეროები ენერგეტიკა და ლოჯისტიკა იყო. ამის შემდეგ, კაჭარავამ ნიდერლანდებში ჰოლდინგი Multiplex Logistics Solutions BV დააფუძნა.
ბოლო წლებში ბიზნესმენი საფრანგეთში ცხოვრობდა.