ბიზნესმენი გელა ობოლაშვილი თბილისში ორი ფარმაცევტული საწარმოს აშენებას გეგმავს. საწარმო 2022 წლიდან დაიწყებს ფუნქციონირებას.
გელა ობოლაშვილი ამჟამად მედიკამენტების მწარმოებელი კომპანია „ბიოპოლუსის“ მეპატრონეა, რომელიც ადრე „ბატფარმის“ სახელით იყო ცნობილი. „ბატფარმა“ კი სკანდალურად ცნობილი კომპანიაა, რომელიც ფსიქოტროპულ მედიკამენტებსაც აწარმოებდა და შუა აზიის ქვეყნებში გაქონდა. 2009 წლის ნოემბრამდე კომპანიის ერთ-ერთი მეწილე ვანო მერაბიშვილის ახლო მეგობარი ლუხუმ კაპანაძე იყო.
2022 წლის პირველი იანვრიდან საქართველოში შემოდის კანონი, რომლის მიხედვითაც, თითოეული ფარმაცევტული საწარმო GMP -ის სტანდარტებს უნდა აკმაყოფილებდეს.
„მინდა 2022 წლისთვის მქონდეს GMP -ის სტანდარტების მქონე თანამედროვე საწარმო და ამისათვის მთლიანად მობილიზებული ვარ. ბევრმა ქვეყანამ ახლა მოთხოვნაში შეიტანა, რომ თუ GMP -ის სტანდარტების საწარმო არ გაქვს, აღარ გიშვებს ქვეყანაში. მე ახლა დამრჩა სამი ქვეყანა - უზბეკეთი, ტაჯიკეთი და ყირგიზეთი, სადაც ჯერ კიდევ გამაქვს პროდუქცია და არ ითხოვენ ამ სტანდარტებს. ადრე ვმუშაობდი რუსეთისა და უკრაინის ბაზარზე, სადაც უკვე დააყენეს მოთხოვნები. როდესაც ამ საწარმოს გავაკეთებთ, მაშინ ბევრი ქვეყანა გაიხსნება ჩემთვის და გეომეტრიული პროგრესიით გაიზრდება ექსპორტიც და წარმადობაც,“ - აღნიშნავს ბიზნესმენი.
ბაზარზე მედიკამენტების ფასებს და ხარისხს გელა ობოლაშვილი ადეკვატურად მიიჩნევს და აღნიშნავს, რომ აზრს მოკლებულია ყველა მოსაზრება, რაც საქართველოში ფასების სიძვირეს უსვამს ხაზს.
„იმპორტირებული პრეპარატების ფასი ხომ ვალუტაზეა ჩამოკიდებული - როდესაც გაიზარდა ვალუტის კურსი, წამლის ფასიც გაიზარდა. ჩვენი მოსახლეობა ყველაფერს ლარებში აღიქვამს, თუმცა ბაზრიდან გამომდინარე წამლის გაძვირება ადეკვატური იყო.
მე არ ვეთანხმები იმ მოსაზრებას, რომ რაღაც უძვირესი ფასებია წამლებზე. ეს პრეტენზიები ქართულ კომპანიებთან კი არ უნდა იყოს, მსოფლიოს ფარმაცევტულ გიგანტებს უნდა მოსთხოვო, რატომ აქვთ ასეთი ძვირი ფასები.
საუბრები, რომ თურქეთში უფრო იაფია წამალი და ჩვენთან ძვირია ასევე აზრს მოკლებულია. აბა გადათვალეთ სამშაბათს, ხუთშაბათს და შაბათს აფთიაქები რომ -25% ფასდაკლებებს აკეთებენ და დათვალეთ. ასე არ არის, ოღონდ რაღაცა ააგორონ და ქარიშხალი გააჩინონ.
მე ვფიქრობ, რომ სახელმწიფო არასოდეს არ უნდა ერეოდეს ბაზრის ფასებში და ფასს ბაზარი უნდა არეგულირებდეს. იმედს ვიქონიებ, რომ ჩვენი ქვეყანა იხელმძღვანელებს ევროპული ცივილური მიმართულებით, ვიდრე პოსტ საბჭოთა სივრცეების მიდგომით,“ - ამბობს ბიზნესმენი.
ლუხუმ კაპანაძე “ბიოპოლუსს” ფლობდა 2012 წლის 18 ოქტომბრამდე. იმ დღეს თავისი წილების 33 პროცენტი სწორედ გელა ობოლაშვილს მიყიდა 300 ათას დოლარად. დანარჩენი 57 პროცენტი ლუხუმ კაპანაძემ გადაუფორმა უმცროს ძმას, უჩა კაპანაძეს. უჩა კაპანაძემ, თავის მხრივ, ერთ კვირაში წილები 520 ათას დოლარად მიყიდა გელა ობოლაშვილს. იმავე დღეს გელა ობოლაშვილს თავისი 10 პროცენტიც სოსო ზაზაშვილმა გადასცა. ობოლაშვილმა ეს 10 პროცენტი 90 ათას დოლარად ავთანდილ ჯანგავაძეს მიყიდა.
მარიამ მორგოშია