„თეიმურაზ ჭიჭინაძე სადავოდ ხდის 506.43 კვ.მ. სასოფლო-სამეურნეო დანიშნულების მქონე მიწის ნაკვეთის ნების საწინააღმდეგოს მისაკუთრების ფაქტს. რამდენადაც შეუძლებელია აღდგეს პირვანდელი მდგომარეობა, რადგანაც მამუკა ხაბარელმა დასახელებულ უძრავ ნივთში გამართა კომუნიკაციები, ეწევა სამეურნეო საქმიანობას და დგას შენობა-ნაგებობები, შესაბამისად, თეიმურაზ ჭიჭინაძე ხაბარელების ოჯახისგან მოითხოვს ზიანის სახით 7090,02 აშშ დოლარის გადახდას. თანხის მოცულობა გამომდინარეობს სსიპ ლევან სამხარაულის სახელობის სასამართლოს ექსპერტიზის ეროვნულ ბიუროს დასკვნიდან და სარჩელის აღძვრის მომენტისთვის იგი შეადგენდა 21,955 ლარს“, – ამის შესახებ ორგანიზაცია „ახალგაზრდა ადვოკატების“ მიერ გავრცელებულ რელიზშია ნათქვამი.
როგორც თეიმურაზ ჭიჭინაძის წარმომადგენელი, „ახალგაზრდა ადვოკატების“ ხელმძღვანელი, არჩილ კაიკაციშვილი აცხადებს, ჭიჭინაძის ოჯახი, 2019 წლის 15 ოქტომბრის მდგომარეობით, სსიპ საჯარო რეესტრის ეროვნული სააგენტოს ამონაწერის თანახმად, დუშეთის მუნიციპალიტეტის სოფელ ჩანადირებში საკუთრების უფლებით ფლობდა 506.43 კვ.მ. მიწის ფართობს. აღნიშნული დადასტურებულია 2000 წლის 16 მაისის მიწის (უძრავი ქონების) სარეგისტრაციო მოწმობით. ამასთან, დადგენილია, რომ თეიმურაზ ჭიჭინაძის მიწის ნაკვეთს ესაზღვრება საქართველოს პარლამენტის წევრის, შოთა ხაბარელის ოჯახის, კერძოდ, შვილის – მამუკა ხაბარელის საკუთრება.
როგორც გავრცელებულ რელიზში, საქმის მასალებზე დაყრდნობით არის განმარტებული, მამუკა ხაბარელი, რომელიც ამჟამად ოლიმპიური კომიტეტის ვიცე-პრეზიდენტია, სხვადასხვა შესაძლებლობების გამოყენებით, ფარული და შეთანხმებული მოქმედებების შედეგად, არამართლზომიერად და უკანონოდ დაეუფლა თეიმურაზ ჭიჭინაძის 506.43 კვ.მ. სასოფლო-სამეურნეო დანიშნულების მქონე მიწის ნაკვეთს, რომელიც 2000 წლის 16 მაისის მიწის (უძრავი ქონების) სარეგისტრაციო მოწმობით და სსიპ საჯარო რეესტრის ეროვნული სააგენტოს 2019 წლის 15 ოქტომბრის ამონაწერის თანახმად, როგორც დაუზუსტებელი ფართი, კანონიერად ეკუთვნოდა ბიზნესმენის ოჯახს. კერძოდ, მამუკა ხაბარელი, 2021 წლის 18 მარტს, განცხადებით მიმართავს სსიპ საჯარო რეესტრის ეროვნულ სააგენტოს, წარადგენს თვითმმართველობის ოქმსა და 2012 წლის თარიღით აზომვით ნახაზს და ახდენს სასოფლო-სამეურნეო დანიშნულების მიწის ნაკვეთების კვ.მ დაზუსტებას. კერძოდ, ახალი ამონაწერით უკვე დგინდება, რომ მამუკა ხაბარელი ფლობს დაზუსტებულ ფართს: 1787.00 კვ.მ და საკუთრებას ენიჭება ახალი საკადასტრო კოდი: 71.56.23.857, რომელშიც უკვე გადასულია თეიმურაზ ჭიჭინაძის კუთვნილი 506.43 კვ.მ. სასოფლო-სამეურნეო დანიშნულების მქონე მიწის ნაკვეთი.
„ახალგაზრდა ადვოკატები“ აღნიშნავს, რომ საქმის მასალების მიხედვით, მამუკა ხაბარელის ქმედებათა შედეგად, თეიმურაზ ჭიჭინაძეს მიადგა მატერიალური ზიანი, ხოლო ზიანის წარმოქმნის შესახებ მხარემ შეიტყო 2020 წლის 28 ოქტომბერს, რა დროსაც, მას სსიპ საჯარო რეესტრის ეროვნული სააგენტოდან ეცნობა, რომ ადგილი ჰქონდა ზედდებას.
მათივე ცნობით, ბიზნესმენს ჰქონდა აღნიშნული უთანხმოების, მოლაპარაკების გზით, შეთანხმებით დასრულების მცდელობა, თუმცა ეს მცდელობები უშედეგოდ დასრულდა.
თბილისის საქალაქო სასამართლოს სამოქალაქო საქმეთა კოლეგიას სარჩელის განხილვა უკვე მომდევნო კვირაში აქვს ჩანიშნული.