ბიზნესმენმა ლაშა ჩოჩელმა სუპერმარკეტების ქსელი „მაგნიტის“ წილი გაყიდა. „კომერსანტის“ ინფორმაციით, „მაგნიტის“ მფლობელ შპს „რითეილ ჯგუფში“ ბიზნესმენმა მინორიტარული წილი 9,96% შპს „დეილის" მიყიდა. გარიგების ფინანსური დეტალები ამ დროისთვის უცნობია, თუმცა როგორც „კომერსანტისთვის“ გახდა ცნობილი ლაშა ჩოჩელი საკუთარი სუპერმარკეტების ქსელის შექმნას გეგმავს, რომელიც 4-5 წლის განმავლობაში 1000-მდე მაღაზიის გახსნას ითვალისწინებს.
რაც შეეხება კომპანია „დეილის“, ის დასავლეთ საქართველოში სუპერმარკეტების ქსელის „დეილის“, საცხობის და სხვა ობიექტების მფლობელია. შესაბამისად „მაგნიტის“ მფლობელ კომპანია „რითეილ ჯგუფში“ 9,96%-იანი წილის მქონე კომპანია „რითეილ ინვესთმენთის“ 100%-იანი წილის მფლობელი ლაშა ჩოჩელის ნაცვლად „დეილი“ გახდა.
დღეისათვის „რითეილ ჯგუფში“ სუბიექტების წილობრივი მდგომარეობა ასეთია:
30%-ი შპს „ქისთოუნ ინვესთმენთი“,
26,67%-ი შპს „დოლნეი ქენსალთენთი“ /კვიპროსი/
20,04%-ი შპს „ჯიბისი ინვესტი“,
13,33%-ი შპს „გუდ ფროდაქტი“,
9,96%-ი შპს „რითეილ ინვესთმენთი“.
სუპერმარკეტების ქსელი ,,მაგნიტი’’ 2015 წლიდან ფუნქციონირებს. როგორც კომპანიის საიტზე განთავსებული ინფორმაციიდან ირკვევა, „მაგნიტი“ პირველია, რომელმაც ძირითადი აქცენტი ქსელის რეგიონებში განვითარებაზე გააკეთა და დღეს, საქართველოს მასშტაბით 270-ზე მეტ ფილიალს და 4500-მდე დასაქმებულს აერთიანებს.
ქსელი მთელი საქართველოს მასშტაბით მჭიდროდ დასახლებულ პუნქტებში, ქალაქებსა და სოფლებშია წარმოდგენილია. კომპანია აერთიანებს მცირე და საშუალო სუპერმარკეტებს, ასევე დიდ და მრავალფუნქციურ სავაჭრო სივრცეებს, რომელიც თბილისსა და ბათუმში „მაგნიტი მაქსის“ სახელითაა წარმოდგენილი.
კომპანიას „მაგნიტის“ წარმოების ხაზი აქვს, რომელიც პურ-ფუნთუშეულს, საკონდიტრო ნაწარმსა და მზა კვების პროდუქტებს აერთიანებს.
„მომხმარებლის კმაყოფილების კვლევა აჩვენებს, რომ „მაგნიტი“ სწრაფად განვითარებადი ინოვაციური და სიახლეებზე ორიენტირებული ქსელია, რომელიც საზოგადოებას ხელმისაწვდომ ფასებს და კომფორტულ მომსახურებას სთავაზობს“, - აღნიშნულია „მაგნიტის“ ვებგვერდზე.