ბიზნესს ვეხმარებით რომ შიდა პოლიტიკა იყოს მაქსიმალურად კანონთან დაახლოებული და ნაკლები პრეტენზია ჰქონდეს მომხმარებელს,- ამის შესახებ გადაცემაში „ბიზნეს ინსაიდერი“ გიორგი აბაშიშვილთან ერთად, კონკურენციის ეროვნული სააგენტოს მომხმარებლის უფლებების დაცვის დეპარტამენტის უფროსის მოადგილემ მარიამ შაიშმელაშვილმა განაცხადა.

მარიამ შაიშმელაშვილმა  2022 წლის 1 ივნისს მომხმარებლების უფლებების დაცვის შესახებ მიღებულ კანონზე ისაუბრა და აღნიშნა, რომ და მან საკმაოდ მოხერხებული გარანტიები შექმნა, რომელშიც კონკურენციის სააგენტო არის ჩართული როგორც მარეგულირებელი ორგანო.

„ევროკავშირთან ასოცირების ფარგლებში არსებული ვალდებულებიდან გამომდინარე, 2022 წლის 1 ივნისს მომხმარებლების უფლებების დაცვის შესახებ კანონი იქნა მიღებული. ჩვენ როგორც ამ კანონის აღმასრულებელი, მარეგულირებელი ორგანო გვაქვს ევროკავშირის თვინინგის პროექტი და ლიეტუელი ექსპერტები არიან ჩვენს გვერდით ამ კანონის განხორციელების პროცესში. პირველ რიგში მისაღები გვქონდა პროცედურული აქტი, რომელიც უნდა ყოფილიყო მაქსიმალურად სამართლიანი და დაფუძნებული ყოფილიყო ლიეტვუას გამოცდილებაზე. ჩვენი საქმიანობა ამ ეტაპზე არის ის, რომ მაქსიმალურად ბიზნესის გვერდით ვართ და ვეხმარებით რომ შიდა პოლიტიკა იყოს მაქსიმალურად კანონთან დაახლოებული და ნაკლები პრეტენზია ჰქონდეს მომხმარებელს, შესაბამისად მომხმარებლების უფლებები მაქსიმალურად იყოს დაცული. 

ბევრი ჩვენი კოლეგა ქვეყანა აღნიშნავს, რომ ძალიან ლიბერალური კანონი გვაქვს, მაგალითად სანქციის ნაწილში, თუკი სააგენტომ დაადგინა, რომ ბიზნესმა მომხმარებელთან ურთიერთობაში რომელიმე კანონი დაარღვია, ნიშნავს იმას რომ პირველივე ჯერზე სააგენტო არ იყენებს სანქციის ბერკეტს, მათ ვეუბნებით რა ვადაში რა ღონისძიებები უნდა გაატაროს. სხვა ქვეყნებში პირდაპირ არის დაჯარიმება და საკმაოდ მაღალი, ჩვენს შემთხვევაში გვაქვს წინა ფინანსური წლის ბრუნვის 2%-მდე სანქციის დაკისრების შესაძლებლობა, სხვა ქვეყანაში პროცენტული მაჩვენებელი საკმაოდ დიდია.

სააგენტოს 35-მდე განაცხადი აქვს წარმოებაში მიღებული. ამ კანონმა ჩამოთვალა თუ რისი უფლება აქვთ მომხმარებელს, როცა შეიძენს ნივთს. საკმაოდ ბევრი ზარი, დაახლოებით 20-40 შემოდის დღის განმავლობაში, რაც კარგია და საშუალებას მისცემს ბიზნესს უფრო მომზადებული იყოს მათი პოლიტიკა არსებულ რეგულაციებთან მიმართებაში.

კანონმა საკმაოდ ბევრი უფლება გაითვალისწინა, უფრო უპირატესი უფლებით სარგებლობს მომხმარებელი ონლაინ ვაჭრობის შემთხვევაში და რატომ? იმიტომ რომ, თუკი ადგილზე ვაჭრობისას მომხმარებელს საშუალება აქვს საქონელი რომელსაც ყიდულობს იქვე შეაფასოს, მათ შორის მისი ზომა, ფერი, მახასიათებლები და მიიღოს ყველა შეკითხვაზე პასუხი კონსულტანტისგან, ონლაინ ვაჭრობის შემთხვევაში კანონი უფრო  მოწყვლადია, როდესაც ნივთის ფიზიკურად ნახვის საშუალება არ აქვს მომხმარებელს, კანონმა მათ მისცა საშუალება ასეთ შემთხვევაში 14 დღის განმავლობაში ნივთი უპირობოდ დააბრუნოს. 

გვაქვს უამრავი კამპანია, ეს მნიშვნელოვანია, რომ იცოდეს მომხმარებელმა რა უფლებები აქვს და ბიზნესმა თუ რა ვალდებულებები აქვს მომხმარებლის წინაშე“, — აღნიშნა მარიამ შაიშმელაშვილმა.