კულტურის მინისტრის განცხადებას იმასთან დაკავშირებით, რომ რეგიონში მიმდინარე საომარმა მოქმედებებმა შესაძლოა საქართველოს პრემიერ-მინისტრის მიერ დაანონსებულ „ვარსკვლავთცვენაზე“ იმოქმედოს და გეგმები ვერ განხორციელდეს, ტურიზმის სფეროში ეხმაურებიან.

“ჰელისკი ჯორჯიას” დამფუძნებელი ვატო ასათაშვილი BM.GE— სთან აცხადებს, რომ მთავრობის წევრების სიტყვას ფასი არ აქვს. რაც შეეხება „ბლექ სი არენას“, სადაც ვარსკვლავების კონცერტები უნდა გამართულიყო ასათაშვილი საბიუჯეტო წურბელას უწოდებს.

“მთავრობის ნებისმიერი წევრის, იქნება ეს პრემიერ-მინისტრი თუ ნებისმიერი სხვა მინისტრი, სიტყვას ფასი არ აქვს. ეს დავინახეთ წლების განმავლობაში. პრემიერი გამოდის და ერთს იძახის და 2-3 თვეში რადიკალურად იცვლება მდგომარეობა, გამოდის მინისტრი და საპირისპიროს ამბობს. ბლექ სი არენა არის საბიუჯეტო წურბელა, რომელსაც სჭირდება სისტემატური დაფინანსება. სწორედ ამიტომ შეიქმნა უაზრო პროგრამები. გვახსოვს Check in Georgia და 1000 სისულელე კიდევ, რომელიც პირდაპირ ბლექ სი არენას მიაბეს, რომ ამ გუნდს შემოსავალი ჰქონოდა.

საუბარი იმაზე, რომ რეგიონში არსებული პრობლემების გამო ვიღაც არ ჩამოვა ქვეყანაში, ჯერ ერთი, რომ არასწორია გამომდინარე იმ მაგალითებისა რაც გვაქვს. შარშან ანალოგიური ღონისძიებები ჩაატარეს, წელს დიდი საერთაშორისო მსოფლიო ჩემპიონატი ჩატარდა ბაკურიანში და დავინახეთ, რომ არანაირი შეფერხება ამ კუთხით არ ყოფილა. ასე რომ არგუმენტირება იმით, რომ რეგიონში უსაფრთხოების პრობლემებია, არასწორია”, - ამბობს “ჰელისკი ჯორჯიას” დამფუძნებელი ვატო ასათაშვილი.


BM.GE

ამავე თემაზე: ვინ, სად და როდის - პრემიერის დაანონსებული „ვარსკვლავთცვენის“ დეტალები ჯერ ისევ გაურკვეველია