ბაიდენის ადმინისტრაცია ევროკავშირს რუსული ფინანსური სისტემის და ენერგეტიკული სექტორის წინააღმდეგ ახალი, უფრო მკაცრი სანქციების მიღებისკენ უბიძგებს.

ამერიკელები მიიჩნევენ, რომ დრო არ ითმენს, რადგანაც ვლადიმირ პუტინი უკრაინის საზღვრიდან ჯარების გაყვანის არანაირ მზადყოფნას არ ავლენს და მკაცრი სანქციების კრემლისთვის მკაფიო გაფრთხილება იქნება.

წყაროების ინფორმაციით, სანქციების მიღების შესაძლებლობა განხილვის სტადიაზეა და ამ თემაზე დისკუსიები შტატებს, ბრიტანეთს, საფრანგეთს და იტალიას შორის მიმდინარეობს. ასევე ეს საკითხი ევროკავშირის შიგნით განიხილება.

ევროკავშირის ქვეყნები მიიჩნევენ, რომ სანქციების ნაჩქარევი მიღება კრიზისის მშვიდობიანი გზით დარეგულირებას შეაფერხებს, მაშინ როდესაც ამერიკელები თვლიან, რომ სანქციების გარეშე რუსეთის შეკავების მცდელობები არაეფექტური იქნება.

სადღეისოდ, ევროპელები სიმკაცრის დემონსტრირებას და დიპლომატიურ ძალისხმევას შორის მყიფე ბალანსის დაცვას ამჯობინებს. ვაშინგტონი ცდილობს დაარწმუნოს ევროპელი მოკავშირეები, რომ ამერიკა მზადაა შეიყვანოს აღმოსავლეთ ევროპაში დამატებითი ძალები იმ შემთხვევაში, თუ რუსეთი უკრაინაში შეიჭრება და რეგიონის ქვეყნების უსაფრთხოებას დაემუქრება.

დასავლელი მაღალჩინოსნების აზრით, რუსული ჯარების კონცენტრაცია უკრაინის საზღვართან შესაძლოა 2022 წლის დასაწყისში დასრულდეს და თუ აგრესია მართლაც დაიწყება, ეს სწორედ იანვარშია მოსალოდნელი.

თუმცა, კრემლი ამგვარი გეგმების არსებობას კატეგორიულად უარყოფს, ამიტომაც, ევროპა მკაცრი ზომების მიღებას არ ჩქარობს.

ევროპა რუსეთის ენერგომატარებლებზე ბევრად უფრო დამოკიდებულია, ეს კი თავად ევროკავშირის ქვეყნების პოტენციური ზარალზე ბევრ კითხვას აჩენს. პირველ რიგში ეს ეხება ფინანსურ სანქციებს, რომლებიც ევროპაში რუსული გაზის და სხვა ნედლეულის ექსპორტს შეაფერხებენ.

სწორედ SWIFT- დან რუსეთის გათიშვა ითვლება ყველაზე რთულ საკითხად, რომლის ირგვლივაც მხარეებს შორის თანხმობა ჯერ მიღწეული არ არის.

ევროპის ენერგომომარაგებას საფრთხეს ასევე მასშტაბური ენერგოკრიზისი და გაზის მწვავე დეფიციტი წარმოადგენენ - ისედაც ძალიან რთულ მდგომარეობაში მყოფ ევროპას აშინებს, რომ რუსული გაზის მიწოდების შეფერხება დეფიციტს კიდევ უფრო გააღრმავებს და ფასების კიდევ უფრო კატასტროფულად გაზრდის - ევროპაში გაზის მოხმარების თითქმის 40% სწორედ „გაზპრომზე“ მოდის.

ამერიკამ უკვე დაითანხმა გერმანია „ჩრდილოეთის ნაკადი-2“-ის შეჩერებაზე იმ შემთხვევაში, თუ რუსეთი უკრაინაში შეიჭრება. იმის მიუხედავად, რომ გერმანიის ახალმა მთავრობამ ამ საკითხზე ოფიციალური პოზიცია ჯერ არ გამოთქვა, გერმანულმა ენერგორეგულატორმა განაცხადა, რომ რუსული გაზსადენის სერტიფიცირება როგორც მინიმუმ 2022 წლის ივლისამდე გადაიდო.

ევროპული ქვეყნები ერთიანობის დემონსტრირებას ცდილობენ, თუმცა, ალიანსის 27 ქვეყნის მიერ ვითარების აღქმა მაინც განსხვავდება - მაგალითად, პოლონეთი და ბალტიის ქვეყნები, რუსეთთან ტერიტორიული სიახლოვის და ისტორიული წარსულის გამო, საფრთხეს უფრო მკვეთრად გრძნობენ, მაშინ, როდესაც დასავლეთ ევროპა უფრო ოპტიმისტურადაა განწყობილი.

ამ დროისთვის განხილვის საგანია რუსეთის წინააღმდეგ სანქციები ფინანსური ინსტიტუტების (მათ შორის SWIFT-ის კუთხით), სამხედრო მრეწველობის, ენერგეტიკული სექტორის წინააღმდეგ. ასევე იგეგმება რუსეთისთვის ტექნოლოგიების მიწოდების შეზღუდვა და ასევე მიზნობრივი პერსონალური სანქციები.

საერთო აზრით,  სანქციების მიღების საკითხი მთლიანად დამოკიდებულია საზღვარზე რუსეთის მოქმედებებზე.

Bloomberg