ამერიკის იუსტიციის სამინისტრო წლის ბოლოს Google-ის წინააღმდეგ სასამართლოში ახალ სარჩელს შეიტანს - ამჯერად ინტერნეტ რეკლამის ბაზრის მონოპოლიზების გამო.
თავად კომპანია ყველა ბრალდებას უარყოფს, და აცხადებს, რომ არავითარ მონოპოლიას არ ფლობს, მეტიც, მას სერიოზული კონკურენტებიც ჰყავს - პირველ რიგში Amazon და Facebook.
ამჟამად აშშ-ის სახელმწიფო უწყება საძიებო სისტემის მიერ ბაზარზე დომინანტური მდგომარეობის ბოროტად გამოყენების თაობაზე გამოძიებას აწარმოებს. იმ შემთხვევაში, თუ ეჭვები კონკრეტული ფაქტებით დადასტურდა, სამინისტრო Google-ს სასამართლოში უჩივლებს.
ამ დროისთვის კონკრეტული გადაწყვეტილება მიღებული არაა, საჩივრის შეტანის ვადებმა შესაძლოა გადაიწიოს. თუმცა, ბოლო წლების გამოცდილებიდან გამომდინარე, ეს სავსებით რეალისტური და მოსალოდნელი პერსპექტივაა.
ჯერ კიდევ დონალდ ტრამპის პრეზიდენტობის პერიოდში სამინისტრომ საძიებო სისტემას სასამართლოში ერთხელ უკვე უჩივლა - ბრალდების არსი ის იყო, რომ კომპანია ტელეფონების მწარმოებლებთან და უსადენო კავშირგაბმულობის ოპერატორებთან განსაკუთრებული ურთიერთობების წყალობით, კონკურენციის ბლოკირებას ახდენდა.
კიდევ ერთი საჩივარი რამდენიმე შტატის გენერალური პროკურორების ჯგუფმა შეიტანა - მათი აზრით, Google ციფრული ვალუტის ბაზარზე კონკურენციას ხელოვნურად აფერხებდა და მისი მონოპოლიზება მოახდინა.
კერძოდ, საჩივრის ერთ-ერთი თემა იყო Google-ის მიერ Facebook-თან დადებული უკანონო გარიგება - საქმე ეხებოდა ონლაინ-აუქციონებს, რომლებზეც საბითუმო ფასად სარეკლამო სივრცე იყიდება.
წყაროს ინფორმაციით, ამჟამად იუსტიციის სამინისტრო გამოძიებას მათ შორის ამ საკითხზეც აწარმოებს.
სახელმწიფო უწყებამ კომენტარებზე უარი განაცხადა, ხოლო Google-მა უარყო ბრალდება სარეკლამო ბაზრის მონოპოლიზებასთან დაკავშირებით.
„ბაზარი სავსეა სხვა მსხვილი კომპანიებით, ისეთებით, როგორც Amazon, Comcast და Facebook. ვერავინ ვერ იტყვის რომ ჩვენი გავლენა ან შემოსავლები მეტია, ვიდრე მათი. ჩვენ მათთან სერიოზული და რთული კონკურენცია გვიწევს და არანაირი კარტელური შეთანხმება ჩვენს შორის არ არსებობს“, - ნათქვამია Google-ის განცხადებაში.
კომპანიამ ასევე უარყო ბრალდება Facebook-ის ინტერესებში აუქციონებით მანიპულირების თაობაზე.
„არსებობს უზარმაზარი კონკურენცია სარეკლამო ინსტრუმენტებში, რომლებმაც ონლაინ რეკლამას დიდი მნიშვნელობა შესძინეს“, - ნათქვამია განცხადებაში.
ახალი შესაძლო საჩივარი ინტერნეტ-გიგანტის წინააღმდეგ ხაზს უსვამს ბაიდენის ადმინისტრაციის სურვილს, გაამკაცროს ანტიმონოპოლიური კანონმდებლობა და ეკონომიკაში კონკურენცია გააძლიეროს.
ამაზე ასევე ნათლად მეტყველებს ისიც, რომ, ბაიდენმა ანტიმონოპოლიური სამსახურის უფროსის პოსტზე Google-ის კრიტიკოსი ჯონათან კარტერი დანიშნა.
ის ასევე წარმოადგენდა კომპანიებს, რომლებიც რეგულატორს Google-ს წინააღმდეგ მკაცრი ზომების მიღებას ფაქტობრივად აიძულებდნენ.
Bloomberg.com