გერმანია რომელიც ბუნებრივი აირის მწვავე დეფიციტს განიცდის, მომავალი თვიდან გაზით მსოფლიოს ერთ-ერთი ყველაზე საკამათო მილსადენით მომარაგდება.
გერმანიაში საწვავის გადაქაჩვა, ბალტიის ზღვის გავლით ახალი გაზსადენით 1 ოქტომბერს დაიწყება. ამ გეგმის რეალიზაციაზე გაზპრომი მუშაობს. ტექნიკურად ყველაფერი მზად არის, მილსადენის ამუშავებას პოლიტიკური ნება და შესაბამისი გადაწყვეტილება სჭირდება, კონკრეტული ვადები კი გერმანიის საზედამხედველო ორგანოების პოზიციაზეა დამოკიდებული.
მილსადენი, რომელსაც დიდი ხანია ელოდებიან, ევროპაში გაზის ბაზარზე მდგომარეობას შეამსუბუქებს. პანდემიის შერბილებისა და ეკონომიკის აღდგენის ფონზე გაზის მოხმარება მატულობს, თუმცა მიწოდების შემცირების გამო გაზზე ფასები მკვეთრად გაზრდილია.
„ჩრდილოეთ ნაკადი-2“-ს ამუშავება გერმანიის კანცლერის ანგელა მერკელის პირადი გამარჯვებაა. ის თითქმის მთელი ათწლეულის მანძილზე, მოკავშირეების, პირველ რიგში შტატების, წინააღმდეგობის მიუხედავად, ამ პროექტს მხარს უჭერდა.
გაზსადენი ამუშავებას ამ კვირას კიდევ უფრო მიუახლოვდა, პროექტის მილის მფლობელმა კომპანიამ განაცხადა, რომ უკანასკნელი მილი უკვე შედუღებულია და უახლოეს დღეებში ის ზღვის ფსკერზე დამონტაჟდება, რაც იმას ნიშნავს, რომ უამრავი პრობლემების და შეფერხებების მიუხედავად, გაზსადენი, რომელიც სულ რამდენიმე თვის წინ გაჩერების პირას იყო ბოლოს და ბოლოს აშენდება
შემდეგი ნაბიჯი დანიის და გერმანიის ტერიტორიაზე გამავალი მილების შეერთება იქნება, რაც გაზის ტრანსპორტირებას შესაძლებელს გახდის. სავარაუდოდ, 1 ოქტომბერს გაზის გადაქაჩვა მილსადენის ორიდან ერთი განშტოებით უნდა დაუწყოს, ორივე ნაწილის ერთობლივი მუშაობა კი 1 დეკემბრიდან დაიწყება.
მფლობელი კომპანიის ინფორმაციით, 2022 წელს მილსადენი ევროპას 5,6 მლრდ. კუბური მეტრ გაზს მიაწვდის. თუმცა, შესაძლოა, ყველაფერმა ასე მშვიდად და გეგმის მიხედვით არ ჩაიაროს. გაზსადენს კიდევ ერთი, საკმაოდ რთული პროცედურა აქვს გასავლელი. ესენია ტექნიკური სერტიფიცირება და დაზღვევა.ამ კუთხით შესაძლოა პრობლემები გაჩნდეს, რადგან ამ საკითხებზე ამერიკული სანქციები მოქმედებს, რომლებიც არავის გაუუქმებია. მართალია, ვაშინგტონი გაზსადენს აღარ ებრძვის და მის ამუშავებას შეეგუა, თუმცა, შემოღებული სანქციები ჯერ კიდევ ძალაშია და მათ გაუქმებას არავინ აპირებს.
შესაბამისად, ძნელი სათქმელია,თუ როგორ იმოქმედებს სერტიფიცირების და სადაზღვევო კომპანიები, რომლებსაც რუსულ გაზსადენთან თანამშრომლობის გამო ამერიკისგან მკაცრი ზომები ელის. შესაძლოა, მოიძებნოს რაღაც სქემა, რომელიც სერტიფიცირებას და დაზღვევას ბიზნესისთვის უსაფრთხოს გახდის.
გერმანიის საზედამხედველო ორგანოსგან მილსადენს სჭირდება ნებართვა, რომელიც ამჟამად მმართველი კომპანიის განაცხადს იხილავს და გაზის ტრანსპორტირების სისტემის დამოუკიდებელი ოპერატორის სტატუსის მინიჭებას ითხოვს.
თავიდან „ჩრდილოეთ ნაკადი-2“-ს ამოქმედება 2019 წელს იგეგმებოდა, თუმცა, ამერიკული სანქციების გამო ამ ვადამ გადაიწია.. ვითარება შეიცვალა მაისში, როდესაც ჯო ბაიდენმა ახალი სანქციების შემოღებაზე უარი თქვა, მოგვიანებით კი გერმანიასთან ამ პროექტთან დაკავშირებით შეთანხმებას მიაღწია.
მოამზადა თენგიზ აბლოთიამ
წყარო:Bloomberg