კოშმარული 2020 წლის შემდეგ დასუსტებული დოლარი პოზიციებს სწრაფად იბრუნებს.
ამის გამო გაოცება გასაგებია - განსაკუთრებით იმის გათვალისწინებით, რომ აშშ-ში ინფლაცია პროგნოზებს მნიშვნელოვნად აჭარბებს, ექსპორტ-იმპორტის დისბალანსი იზრდება, რბილმა ფისკალურმა პოლიტიკამ მთელი მსოფლიო დოლარებით აავსო, ხოლო ავღანეთში შტატების დამარცხებამ დაადასტურა, რომ ამერიკა უკვე არაა ის ძალა, რომლის ნდობაც უპირობოდ შეიძლება.
თუმცა, დოლარის ფატალური დასუსტების პროგნოზები ნაადრევია - ვალუტის კურსი ცვალებადია და ის ამა თუ იმ ქვეყნის ეკონომიკის სიძლიერეზეა დამოკიდებული. ცალსახაა, რომ უახლოესი თვეები ამერიკის ეკონომიკისთვის ხელსაყრელი იქნება - ძირითადი პარტნიორებისგან განსხვავებით.
სავაჭრო დეფიციტის ზრდა მართლაც შემაშფოთებელია, თუმცა, თავისთავად ეს ცუდი არაა - ამის მიუხედავად, აშშ-ის ეკონომიკის ზრდის პერსპექტივები ბევრად უკეთესია სხვა ქვეყნებთან შედარებით.
თუ არ ვისაუბრებთ პანდემიაზე, დანარჩენი მსოფლიოს პრობლემები ჩინეთიდან იწყება - მისი ეკონომიკური წარმატება დაკრედიტების სწრაფ ზრდას ეფუძნებოდა, ამიტომ, როდესაც ეკონომიკა მუხრუჭდებოდა, ოფიციალური პეკინი ბანკებისგან ახალი სესხების გაცემას მოითხოვდა. ამჟამად ეს თამაში დასასრულს უახლოვდება - ჩინეთის წლიური საპროცენტო ხარჯები მშპ-ს ზრდას აღემატება, ეს კი ინფლაციის მაღალ რისკს ქმნის.
ამიტომაც ეკონომიკის რეალური ზრდა შენელდა და ეს ჩინეთის სავაჭრო პარტნიორებზე უკვე აისახა. პეკინმა უკვე შეარბილა ფულად-საკრედიტო პოლიტიკა, რაც მკვეთრად აისახება ევროპაზე, რომლის ზრდაც მნიშვნელოვნად არის დამოკიდებული აზიის ბაზრის მოთხოვნაზე. პირველ რიგში ეს, რა თქმა უნდა, ჩინეთს შეეხება.
ამავე დროს ამერიკის ეკონომიკა საგარეო მოხმარებაზე გაცილებით ნაკლებადაა დამოკიდებული და ეს, თავისთავად, დოლარის გაძლიერებაზე მუშაობს. აშშ-ის ეკონომიკის მოსალოდნელზე სწრაფი აღდგენა ასევე დოლარზე მოთხოვნას გაზრდის და ეს იმ დროს, როდესაც ევრო, რომელიც რამდენიმე ძლიერი სახელმწიფოს ერთიან მიდგომაზეა დამოკიდებული, სავარაუდოდ დღევანდელ მდგომარეობას შეინარჩუნებს, მაგრამ მნიშვნელოვნად არ გაიზრდება.
ასევე გასათვალისწინებელია დოლარის მიწოდება - ფედრეზერვმა პანდემიის დროს ეკონომიკის მხარდაჭერის მიზნით ბაზარზე დოლარების დიდი რაოდენობა გამოუშვა. 2020 წლის თებერვლიდან ფულადი მასის მაჩვენებელი M2 მკვეთრად, 5 ტრლნ დოლარით (33%-ით) $20,5 ტრლნ–მდე გაიზარდა. ბოლო თვეებში ეს ნაკადი შემცირდა, თუმცა, ფულადი მასის ასეთი უზარმაზარი მიწოდება გრძელვადიან ეფექტს იძლევა.
სავარაუდოდ, ფედერალური რეზერვი უახლოეს პერიოდში დოლარების მიწოდებას შეამცირებს და ამავე დროს სწრაფი ზრდა ამერიკის ეკონომიკურ მაჩვენებლებს გააუმჯობესებს, დოლარი კი გაძლიერდება.
ამერიკული ვალუტის ტრიუმფალური დაბრუნება შეასუსტებს არა მხოლოდ ევროს, არამედ ბევრი სხვა განვითარებადი ქვეყნების ვალუტებს - მაგალითად, ისეთებს, როგორც თურქული ლირა და სამხრეთ აფრიკული რანდია, რომლებსაც ძლიერი დევალვაცია ელის.