წარმოიდგინეთ – თქვენ გაქვთ ანგარიში ამერიკის ფედერალურ სარეზერვო სისტემაში, და შეგიძლიათ ნებისმიერი თანხის გადარიცხვა ან მიღება ტელეფონით ან ნოუთბუკით -ყოველგვარი შუამავლების, საკომისიოს და გზავნილის მიღების დალოდების გარეშე.
ეს ფუტურისტების ოცნება და ბანკირების წყევლაა და ეს იდეა არა კრიპტოვალუტების სამყაროში, არამედ ამერიკის ფინანსურ და პოლიტიკურ ელიტაში გაჩნდა. ელექტრონული დოლარის კონცეფციის მომხრეთა შორისაა ფედერალური სარეზერვო ოსისტემის თავჯდომარე ჯერომ პაუელი, ასევე აქტიურად უჭერს მხარს სასაქონლო ფიუჩერსებით ვაჭრობის კომისიის ყოფილი ხელმძღვანელი ჯეი ჯანკარლო და ბევრი სხვა ცნობილი ამერიკელი ეკონომისტი და ფინანსისტი.
ამ დროისთვის ციფრული დოლარის იდეაზე აქტიური მუშაობა მაღალი ტექნოლოგიების მექაში, მასაჩუსეტსის ტექნოლოგიურ ინსტიტუტში მიმდინარეობს, ვირტუალურ დოლარს მხარს დემოკრატებიც და რესპუბლიკელებიც უჭერენ.
პოლიტიკოსები ამ კონცეფციას ჩინეთთან ორთაბრძოლის ნაწილად განიხილავენ, რადგანაც ოფიციალური პეკინი ციფრულ იუანზე გაცილებით უფრო აქტიურად მუშაობს, ვიდრე ამერიკა ელექტრონულ დოლარზე - ამ დროისთვის ჩინური ვირტუალური ეროვნული ვალუტის ცდები უკვე მიმდინარეობს და მისი პრაქტიკული დანერგვა შორეული პერსპექტივა არაა.
თუმცა, ელექტრონულ დოლარს სერიოზული მოწინაამღდეგეებიც ჰყავს - მაგალითად ბანკირები, რომელთა საქმიანობაც 17 ტრლნ დოლარის დეპოზიტების მეშვეობით ფინანსდება.
ასევე, ბანკები ტრანზაქციების, გზავნილების განაღდების და ბანკომატებს მომსახურეობით დიდ მოგებას იღებენ - ელექტრონული დოლარის შემოღება მთელს ამ უზარმაზარ სისტემას უქმნის საფრთხეს.
საბანკო პოლიტიკის ინსტიტუტის პრეზიდენტის გრეგ ბაერის თქმით, მომსახურეობის ბევრი სახეობა, მაგალითად, იპოთეკური დაკრედიტება გართულდება იმ შემთხვევაში, თუ ფედერალური რეზერვი საბანკო სისტემის ისტორიულად ჩამოყალიბებული როლის დაკნინებას შეეცდება.
ფინანსისტები ასევე მიიჩნევენ, რომ ციფრული დოლარი საბანკო სისტემის დესტაბილიზაციას გამოიწვევს, ხოლო ფედრეზერვი წარმოუდგენელი მასშტაბის ძალაუფლებას მიიღებს.
არის თუ არა რეალურად საჭირო ელექტრონული დოლარი - საკამათო საკითხია. მსხვილი კორპორაციებისთვის ბანკთაშორისი ტრანზაქციები ისედაც საკმაოდ სწრაფია, რაც მის მიმზიდველობას ამცირებს.
ფედერალური რეზერვი ელექტრონული დოლარის იდეას 2017 წლიდან აკვირდება, მაგრამ მრავალი საკითხი ჯერაც გადაუწყვეტელი რჩება - მაგალითად, რა როლი ექნებათ კერძო საფინანსო ინსტიტუტებს.
იმ შემთხვევაში, თუ მეანაბრეები ელექტრონულ ვალუტაში გადასვლას დააპირებენ, ბანკებს სესხების გაცემის ახალი სისტემის მოფიქრება მოუწევთ.
ციფრული დოლარის მომხრეები კი მიიჩნევენ, რომ სახელმწიფოს ბანკებისთვის გარკვეული დამცავი რეგულაციების დაწესება შეუძლია - მაგალითად, ელექტრონული ვალუტის ფლობის გარკვეული ლიმიტის დაწესება.
ბარაკ ობამას ადმინისტრაციაში სახაზინო მრჩევლის ლევ მენანდის თქმით, ციფრული ვალუტის შექმნის პროცესში ასეთი ტიპის კომპრომისები დაუშვებელია - მისი აზრით, თუ ამ ტიპის ფულადი ერთეული შეიქმნა, მასთან მიმართებაში არავითარი შეზღუდვები არ უნდა დაწესდეს.
„ელექტრონული ვალუტის შექმნას შესაბამისი კანონის მიღება დასჭირდება და კონგრესი არჩევანის წინაშე დადგება - შექმნას ცენტრალური ბანკის სრულფასოვანი ვალუტა, თუ უცხიმო რძე, რომელიც ბანკების სასარგებლოდ გაზავებული იქნება“, - განაცხადა მან.
bloomberg.com
ციფრული დოლარი
