გერმანიის ახალი კანცლერი ოლაფ შოლცი, სავარაუდოდ, ხელს არ შეუშლის „ჩრდილოეთის ნაკადი-2“-ს ამუშავებას, თუმცა, შესაძლოა, მის ნაცვლად ეს გერმანულმა ბიუროკრატიამ გააკეთოს.
გერმანიის და ევროკავშირის ყველა უწყების მიერ გაზსადენის სერტიფიცირებას სავარაუდოდ, 6-დან 8 თვემდე დასჭირდება.
აშშ-ის მხრიდან სულ უფრო ზრდადი ზეწოლის მიუხედავად, შოლცს მილსადენის პროექტისადმი მკაცრი პოზიციის გამოხატვა არ დასჭირდება - მას ამ საქმეში ბიუროკრატია უშველის. ნოემბრის შუა რიცხვებში გერმანიამ ადგილობრივ კანონმდებლობასთან შეუსაბამობის გამო, „ჩრდილოეთის ნაკადი-2“-ის სერტიფიცირება დროებით შეაჩერა.
ნებართვის გაცემის პროცედურა მხოლოდ მას შემდეგ განახლდება, რაც მილსადენის ოპერატორი Nord Stream 2 AG შექმნის შვილობილ კომპანიას, რომელიც პროექტის გერმანული ნაწილის მართვას ჩაიბარებს.
თუმცა, ეს ავტომატურად მილსადენის ამუშავებას არ ნიშნავს - „მწვანე შუქი“ „ჩრდილოეთის ნაკად-2“-ს უნდა აუნთონ გერმანიის ფედერალურმა რეგულატორმა და ევროკავშირის ორმა უწყებამ, რომლებიც მოქმედების დიდი სისწრაფით არ გამოირჩევიან.
ამის შემდეგ Nord Stream 2 AG-სთვის გაცემულმა სერტიფიკატმა უნდა გაიაროს შემოწმება ევროკავშირში და მხოლოდ ამის შემდეგ გერმანიას შეუძლია საბოლოო თანხმობის მიცემა.
მთელ პროცესს კიდევ 6-დან 8 თვემდე დასჭირდება. ამერიკა არაერთხელ მოუწოდებდა გერმანიას „ჩრდილოეთის ნაკადი-2“ - ს მხარდაჭერაზე უარის თქმას, რადგანაც პროექტს ევროპის ენერგოუსაფრთხოებისთვის მუქარად აფასეს. მაგრამ ამის მიუხედავად, ბერლინი ამ პროექტის გაჩენის პირველივე დღიდან მას ყველანაირად მხარს უჭერდა.
რამდენიმეჯერ საქმე შტატებს და გერმანიას შორის პირდაპირ სიტყვიერ დაპირისპირებამდე მივიდა და საბოლოოდ, ვაშინგტონი და ბერლინი შეთანხმდნენ, რომ გაზსადენი, ყველაფრის მიუხედავად, ამუშავდება. თუმცა, ისინი ერთიან აზრამდე მივიდნენ, რომ რუსეთს სანქციები დაემუქრება იმ შემთხვევაში, თუ მოსკოვის გაზსადენს სხვა ქვეყნებზე ზეწოლისთვის გამოიყენებს.
დღეს აშშ „ჩრდილოეთის ნაკადი-2“-ის ბლოკირებას უკრაინის ირგვლივ შექმნილი ვითარების გამოყენებით გეგმავს. წყაროების ინფორმაციით, ბაიდენის ადმინისტრაცია მოითხოვს ბერლინისგან გაზსადენის გაჩერებას იმ შემთხვევაში, თუ მოსკოვი უკრაინის წინააღმდეგ შეიარაღებულ აგრესიას მართლაც წამოიწყებს.
ამ ეტაპზე გერმანიის მთავრობა ამ კუთხით არანაირ გარანტიებს და დაპირებებს არ იძლევა - ბერლინის აზრით, ამ დაპირებას დღეს აზრი არა აქვს, იმიტომ, რომ მდგომარეობა გაზსადენის ირგვლივ მთლიანად გერმანული რეგულატორების ხელშია, ხოლო შოლცის მთავრობას მათზე გავლენის მოხდენის არანაირი ბერკეტები არ გააჩნია.
bloomberg.com