Bloomberg Economics-ის პროგნოზით, რუსეთს წელს ენერგორესურსების ექსპორტიდან 321 მლრდ დოლარს გამომუშავება შეუძლია, რაც 2021 წელზე მესამედით მეტია. გარდა ამისა, წლევანდელი წელი რუსეთმა შესაძლოა, მიმდინარე საოპერაციო ანგარიშების რეკორდული პროფიციტით დაასრულოს, რამაც, საერთაშორისო საფინანსო ინსტიტუტის მონაცემებით, შესაძლოა, 240 მლრდ დოლარს მიაღწიოს.
„სანქციების დაწესების მიუხედავად, რუსეთში, როგორც ჩანს, მყარი ვალუტის მნიშვნელოვანი შედინება გრძელდება,“ - ნათქვამია საერთაშორისო საფინანსო ინსტიტუტის ეკონომისტების მოხსენებაში.
თუმცა Bloomberg შენიშნავს, რომ რუსულ ნავთობსა და გაზზე სრული ემბარგოს დაწესების შემთხვევაში, პროგნოზი შესაძლოა, მთლიანად შეიცვალოს. რუსული ნავთობის ექსპორტი და წარმოება ისედაც იკლებს. ენერგეტიკის საერთაშორისო სააგენტო პროგნოზირებს, რომ მიმდინარე თვეში რუსეთმა შესაძლოა, ნავთობის მოპოვების, თითქმის, მეოთხედი დაკარგოს.
რუსული ენერგიის ბევრი ტრადიციული მყიდველი სხვა ვარიანტებს ეძებს და მომარაგების ახალ კონტრაქტებზე ხელმოწერას არ აპირებს, სხვა ქვეყნები კი, მაგალითად, ინდოეთი და ჩინეთი, ნავთობს დიდი ფასდაკლებით ყიდულობენ. ნავთობი და გაზი რუსეთის ექსპორტის, დაახლოებით, ნახევარს შეადგენს და გასულ წელს ბიუჯეტს შემოსავლების, თითქმის, 40% მოუტანა.
„ნახშირწყალბადების შემოსავლები რუსეთის ეკონომიკის მაშველი რგოლია, რაც სანქციების შედეგებს ამსუბუქებს და საგადამხდელო ბალანსის კრიზისის თავიდან აცილებას ხელს უწყობს. თუმცა ენერგეტიკული ემბარგოს გარეშეც კი ინფლაცია მკვეთრად იზრდება და ქვეყანას ღრმა რეცესია უახლოვდება,“ - აცხადებს Bloomberg Economics-ის ეკონომისტი, სკოტ ჯონსონი.
თუმცა TS Lombard-ის თანახმად, რუბლის მკვეთრი გაუფასურებისა და დოლარში ნავთობის მაღალი ფასების ერთობლიობა წელს რუსეთის ბიუჯეტს, დამატებითი შემოსავლის სახით, 8,5 ტრლნ რუბლს (103 მლრდ დოლარს) მოუტანს.
„როგორც ჩანს, სანქციები ეკონომიკის არაენერგეტიკულ ნაწილს გაანადგურებს და რუსეთი ენერგეტიკაზე კიდევ უფრო დამოკიდებული გახდება,“ - ამბობს TS Lombard-ის ანალიტიკოსი, მადინა ხრუსტალევა.
Goldman Sachs-ის პროგნოზით, წელს რუსეთში საქონლის იმპორტი 20%-ით შემცირდება, რაც ექსპორტის მოსალოდნელ შემცირებას ორჯერ აღემატება, ხოლო რუსეთის მიმდინარე ოპერაციების ანგარიშის პროფიციტი 205 მლრდ დოლარს მიაღწევს.
საერთაშორისო საფინანსო ინსტიტუტის მონაცემებით, თუ ევროკავშირი, აშშ და დიდი ბრიტანეთი რუსული ენერგორესურსების იმპორტს ერთობლივად აკრძალავენ, ქვეყნის მშპ 20%-ით შემცირდება. ასეთი ნაბიჯი რუსეთის საექსპორტო შემოსავლებს 300 მლრდ დოლარს დააკარგვინებდა.
ემბარგო
