ჯანმრთელობის დაცვის ბიზნესი ის სფეროა, რომელსაც სადაზღვევო ინდუსტრიაში პრობლემა ყველაზე ნაკლებად შეეხო. სადაზღვევო ასოციაციის ხელმძღვანელის დევი ხეჩინაშვილის ინფორმაციით, მოთხოვნა ამ სეგმენტში მეტნაკლებად შენარჩუნებულია. ამასთან, მაღალი ინფლაციის გავლენა აისახა ტარიფებზე და დაზღვევა დაახლოებით 10%-ით გაძვირდა.
მიიღე ინფორმაცია უფრო სწრაფად „კომერსანტის“ Telegram-ზე.
,,სადაზღვევო ინდუსტრიისთვის, როგორც ზოგადად ყველა ბიზნესისთვის, საკმაოდ რთული პერიოდია. თუმცა კლება არ გვაქვს, ეკონომიკური მდგომარეობა იმ ნაწილში, რომელიც ეზღვევა, შედარებით სტაბილურია. მიუხედავად იმისა, რომ სერვისები გაძვირდა, მიმაჩნია, რომ ეს არ არის ფასების მნიშვნელოვანი ზრდა იმასთან შედარებით, როგორი ცვლილებაც სამამხმარებლო კალათის მაჩვენებლებში აისახა. შეიძლება ითქვას, რომ სექტორში ჯერჯერობით სტაბილურობაა იმის მიუხედავად, რომ მოლოდინები მაინცდამაინც სახარბიელო არ არის. როგორც ვახსენე, ინფლაციური ზეწოლა დიდია. სამედიცინო თვალსაზრისით, მნიშვნელოვანი გაძვირებაა. ვნახოთ ელექტრონული რეცეპტი, ჯენერიკული საშუალებების დამკვიდრების საკითხი, კონტროლის მექანიზმი და სხვა, როგორ იმუშავებს“, - ამბობს დევი ხეჩინაშვილი ,,კომერსანტთან“.
სადაზღვევო ასოციაციის ხელმძღვანელის თქმით, სერიოზული პრობლემაა იმასთან დაკავშირებით, რომ ავტომფლობელების სამოქალაქო პასუხისმგებლობის ე.წ. მესამე პირის მიმართ პასუხისმგებლობის სავალდებულო დაზღვევის ამოქმედების შესახებ კანონპროექტი გვიანდება.
,,ვცდილობთ, რომ ინტენსიურ და კონკურენტულ გარემოში პოზიციები შევინარჩუნოთ და გავზარდოთ კიდევაც, ამისთვის კი ახალი პროდუქტების შეთავაზება ბაზრისთვის სასიცოცხლოდ მნიშვნელოვანია. ყოველ წელს ველოდებით, რომ ავტომობილების მფლობელთათვის სავალდებულო ავტოდაზღვევა ამოქმედდება, როგორც ეს მთელ მსოფლიოშია. კანონპროექტი პარლამენტში შეტანილია და იმედია, წელს განიხილავს. ჩვენი ინდუსტრიის განვითარების პერსპექტივა ამაზეა დამოკიდებული“, - ამბობს ხეჩინაშვილი.
რაც შეეხება უკვე დაზღვეული მანქანების რაოდენობას, არსებული მონაცემით, საქართველოში თითქმის 1,5 მილიონი მანქანაა რეგისტრირებული და აქედან, როგორც ხეჩინაშვილი აღნიშნავს, მხოლოდ 80 ათასია დაზღვეული ანუ 5-6%-ის ფარგლებში.
მარი ჩიტაია