2022 წლის 6 დეკემბრის მდგომარეობით, მიმდინარე წელს 30861 სამკვიდრო მოწმობა გაიცა. როგორც პარლამენტის საიტზე განთავსებული ინფორმაციიდან ირკვევა, დეპუტატმა თამარ კორძაიამ იუსტიციის სახლისგან გასული წლების სამკვიდროსთან დაკავშირებით არსებული სტატისტიკური მაჩვენებლები ითხოვა გენდერულ ჭრილში.

„მოგეხსენებათ, საქართველოში ქალების, როგორც მემკვიდრედ არსებობის ფაქტები იშვიათია. გთხოვთ, მოგვაწოდოთ ამ საკითხთან დაკავშირებით სტატისტიკური მონაცემები, კონკრეტულად 2016-2022 წლებში რამდენმა ქალმა და რამდენმა კაცმა მიიღო სამკვიდრო?“, - აღნიშნულია დეპუტატის მიერ იუსტიციის სახლისთვის გაგზავნილ წერილში.

იუსტიციის სახლმა კი ინფორმაციის დაზუსტება საქართველოს ნოტარიუსთა პალატაში ითხოვა. პალატის მიერ იუსტიციის სახლისთვის მიწერილი წერილით დგინდება, რომ ნოტარიუსთა პალატაში არ მუშავდება ინფორმაცია სანოტარო მოქმედების მონაწილეთა სქესის თაობაზე.

ხოლო რაც შეეხება სტატისტიკას, როგორც ნოტარიუსთა პალატაში განმარტავენ, უწყებაში მონაცემები სისტემატიზებული სახით ინახება 2009 წლის 23 მარტიდან, როდესაც დაიწყო ელექტრონული სანოტარო რეესტრის წარმოება.

სანოტარო რეესტრის მონაცემებზე დაყრდნობით საანგარიშო პერიოდში დამოწმებულია შემდეგი რაოდენობის სამკვიდრო მოწმობა:

2016 წელი - 27115 სამკვიდრო მოწმობა;

2017 წელი - 29617 სამკვიდრო მოწმობა;

2018 წელი - 28846 სამკვიდრო მოწმობა;

2019 წელი - 27530 სამკვიდრო მოწმობა;

2020 წელი - 22834 სამკვიდრო მოწმობა;

2021 წელი - 32383 სამკვიდრო მოწმობა;

01.01 - 06.12.2022 წელი - 30861 სამკვიდრო მოწმობა.