საქართველოს პრემიერ-მინისტრის ირაკლი ღარიბაშვილის ინფორმაციით, მინერალური წყალი „ბორჯომის“ შესახებ სასიამოვნო ინფორმაცია ცოტა ხანში გახდება ცნობილი.

ღარიბაშვილს ჟურნალისტებთან ინფორმაციის დეტალებზე არ უსაუბრია, თუმცა, აღნიშნა, რომ „ბორჯომის“ პრობლემის მოგვარებაზე მთავრობა აქტიურად მუშაობს.

„ბოლო დღეებში გვესმის ჩვენ პრობლემა, რომ „ბორჯომის“ მესაკუთრე არის სანქცირებული და ჩვენ ახლა აქტიურად ვმუშაობთ და მოქალაქეებს ძალიან მალე ვეტყვით სასიამოვნო ინფორმაციას. მე ახლა არ მინდა დეტალებზე დღეს ვისაუბრო, მაგრამ გარწმუნებთ, რომ ყველა ამ პრობლემებზე აქტიურად ვმუშაობთ“, - განაცხადა პრემიერ-მინისტრმა.

სანქციების გამო, „ბორჯომი“ წარმოებას დროებით აჩერებს. კომპანიის მიერ გავრცელებული განცხადების თანახმად, უკრაინაში საომარი მოქმედებების დაწყების დღიდან, კომპანია IDS ბორჯომი საქართველო მძიმე ვითარებაში აღმოჩნდა და იძულებულია, ა/წ 29 აპრილიდან დროებით შეაჩეროს ბორჯომის ჩამომსხმელ ორივე ქარხანაში წარმოების პროცესი. „ბორჯომის“ გაყიდვები ნაშთების ამოწურვამდე გაგრძელდება.  კომპანიის მენეჯმენტის განმარტებით, საბანკო ანგარიშებზე სრული წვდომა როგორც კი აღდგება, „ბორჯომი“ წარმოების პროცესს განაახლებს.

“ლელოს” დამფუძნებელი მამუკა ხაზარაძე სანქციების გამო კომპანია „ბორჯომის“ საწარმოს დროებით გაჩერების ფაქტს სოციალურ ქსელში გამოეხმაურა და განაცხადა, რომ სახელმწიფომ უნდა გამოისყოდოს „ბორჯომის“ აქციები და თბილისის საფონდო ბირჟის საშუალებით გაასხვისოს საქართველოს მოქალაქეებზე. 

,,ბორჯომის“ ქარხნების დახურვის კატეგორიული წინააღმდეგია ბიზნესმენი თემურ ჭყონიაც . ერთადერთ გამოსავალს ისიც კომპანიის დროებით ნაციონალიზაციაში ხედავს და მთავრობას მოუწოდებს, გაუფრთხილდეს ეროვნულ ბრენდს, დანიშნოს დროებითი მმართველი და არ დაუშვას ,,ბორჯომის“ გაჩერება.

ბიზნესმენების პოზიციოას იზიარებს ექსპერტი გია ხუხაშვილიც. ის  კიდევ ერთხელ გამოდის „ბორჯომის“ ნაციონალიზაციის წინადადებით.მისი შეფასებით, ეს ბრენდი არის ქართული მატერიალური და არამატერიალური კულტურის განუყოფელი ნაწილი. შესაბამისად, სტრატეგიული ობიექტი და მისი გაჩერება არის სახელმწიფო უსაფრთხოების საკითხი, თავი რომ გავანებოთ მრავალმილიარდიან ზარალს, რაც ასწლოვანი ისტორიის განმავლობაში მოპოვებული აქტივის დაკარგვას უკავშირდება.

"ამიტომ, სასწრაფოდ უნდა მოხდეს საწარმოს ნაციონალიზაცია, რაზეც რამდენიმე თვის წინ მივმართე ხელისუფლებას და ყური არ შეიბერტყეს. შემდგომში შესაძლოა პრივატიზაცია, პოლიტიკურად დაზღვეულ პირობებზე“, - წერს სოციალურ ქსელში გია ხუხაშვილი.