ბორის ჯონსონი ამბობს, რომ სატელეფონო საუბრისას, ვლადიმირ პუტინი მას სარაკეტო დარტყმით დაემუქრა. ამის შესახებ დიდი ბრიტანეთის ყოფილი პრემიერი ბორის ჯონსონი დოკუმენტურ ფილმში „პუტინი დასავლეთის წინააღმდეგ“ საუბრობს.

როგორც BBC წერს, ჯონსონსა და პუტინს შორის საკმაოდ ხანგრძლივი სატელეფონო საუბარი 2022 წლის თებერვალში, უკრაინაში რუსეთის შეჭრამდე შედგა, როცა პრემიერმა პუტინი გააფრთხილა, რომ მოსალოდნელი ომი სრული კატასტროფა იქნებოდა.

ფილმში ჩანს, როგორ აფრთხილებს ჯონსონი პუტინს, რომ უკრაინაში შეჭრა გამოიწვევდა დასავლეთის სანქციებს და რუსეთის საზღვრებთან ნატოს ჯარების მობილიზებას.

„ის ერთ მომენტში დამემუქრა და მითხრა: „ბორის, არ მინდა ზიანი მოგაყენო, მაგრამ რაკეტით ამას მხოლოდ ერთი წუთი დასჭირდება,“ - ამბობს ჯონსონი.

სატელეფონო საუბრიდან ცხრა დღის შემდეგ, 11 თებერვალს, თავდაცვის მინისტრი ბენ უოლესი მოსკოვში თავის რუს კოლეგა სერგეი შოიგუსთან შესახვედრად გაემგზავრა.

BBC-ის დოკუმენტური ფილმში „პუტინი დასავლეთის წინააღმდეგ“ ჩანს, რომ უოლესი დარწმუნებული იყო, რომ რუსეთი უკრაინაში არ შეიჭრებოდა, მაგრამ ჯონსონი ამბობს, რომ ორივე მხარემ იცოდა, რომ ეს სიცრუე იყო.

მისი თქმით, რუსეთის მხრიდან ეს ბულინგის ან ძალის დემონსტრირება იყო: „მე მოგატყუებ, შენ იცი, რომ ვიტყუები და მე ვიცი, რომ იცი, რომ გატყუებ და მაინც ვაპირებ მოგატყუო“.

ორ კვირაზე ნაკლები ხნის შემდეგ, როცა 24 თებერვალს რუსული ტანკები უკრაინაში შევიდა, შუაღამისას ჯონსონს უკრაინის პრეზიდენტმა ზელენსკიმ დაურეკა.

„ზელენსკი ძალიან, ძალიან მშვიდი იყო, იხსენებს ჯონსონი, მაგრამ მან მითხრა, რომ რუსეთი უკრაინას ყველა მხრიდან თავს ესხმოდა. ამ საუბრისას ჯონსონმა უკრაინის პრეზიდენტს უსაფრთხო ადგილას გადაყვანა შესთავაზა.

„მან შეთავაზება არ მიიღო, გმირულად დარჩა იქ, სადაც იყო,“ - ამბობს ფილმში ჯონსონი.

დოკუმენტური ფილმის „პუტინი დასავლეთის წინააღმდეგ“ ჩვენება BBC 2-ზე დღეს, 30 იანვარს შედგება.