დიდი შვიდეულის ქვეყნებმა და ნატო-ს მოკავშირეებმა არ უნდა წაახალისონ უკრაინა, დათანხმდეს მშვიდობის არამომგებიან პირობებს, მაშინ როდესაც რუსეთის ომი იწელება, - ამის შესახებ გაერთიანებული სამეფოს პრემიერ-მინისტრმა ბორის ჯონსონმა განაცხადა. ინფორმაციას გამოცემა Politico ავრცელებს.
ჯონსონმა კიდევ ერთხელ გამოხატა წუხილი იმასთან დაკავშირებით, რომ ახლა მსოფლიოში იგრძნობა დაღლილობა უკრაინის საკითხით. მან დასავლურ სახელმწიფოებს მოუწოდა „უკრაინელებს სტრატეგიული ამტანობა მისცენ“.
„ჩემი გზავნილი დიდი შვიდეულისა და ნატო-ს კოლეგებს, ახლა არ არის მოლაპარაკებისა და ცუდი მშვიდობის პირობების მისაღებად უკრაინელების წაქეზების დრო. არ არის ისეთი მშვიდობის მიღების დრო, რომლის სანაცვლოდაც მათ ტერიტორიების დათმობას სთხოვენ ცეცხლის შეწყვეტის სანაცვლოდ“, - განაცხადა ჯონსონმა.
მისი თქმით, მსგავსი სცენარი კატასტროფის გამომწვევი იქნება, რომელიც, დიდი ალბათობით, გამბედაობას შეჰმატებს რუსეთის პრეზიდენტს ვლადიმერ პუტინს და მსოფლიოს დამატებით ეკონომიკურ ზარალს მოუტანს.
„მოვიდა იმის აღიარების დრო, რომ უკრაინელებს დახმარება სჭირდებათ, რათა შეცვალონ დინამიკა დონბასში, სევეროდონეცკში, შემდეგ კი სამხრეთით სახმელეთო ხიდის მიდამოში“, - განაცხადა მან.
ამასთან, ჯონსონმა ხაზი გაუსვა სასურსათო უსაფრთხოების მნიშვნელობას.
„ზოგიერთი უღარიბესი ქვეყანა აბსოლუტურად დამოკიდებულია უკრაინიდან მიწოდებულ მარცვლეულზე“, - განაცხადა ჯონსონმა.
ბორის ჯონსონი
