ბორუსან კატ საქართველოს წარმომადგენლობაში მომხმარებლებისთვის მიმდინარე ზაფხულიდან სიახლეა – კომპანიამ ახალი დანადგარები შეიძინა, რომელთა მეშვეობითაც შესაძლებელია საწვავი სისტემის მთავარი კომპონენტების დიაგნოსტირება და შეკეთება, რაც ასევე დიდ სიახლეს წარმოადგენს ბაზრისთვის.
დანადგარების შესაძლებლობებისა და უპირატესობების შესახებ უფრო დეტალურად გვესაუბრება კომპანიის ტექნიკოსების ჯგუფის უფროსი გოჩა ტყეშელაშვილი.
– რა შესაძლებლობები გააჩნია აღნიშნულ დანადგარებს და კონკრეტულად ვისთვის არის ისინი განკუთვნილი?
– საწვავის სისტემაში არსებული პრობლემები აქტუალური საკითხია სპეც ტექნიკის მფლობელებისთვის. ნებისმიერი ტექნიკის გამართულად მუშაობისთვის აუცილებელი პირობაა, რომ აღნიშნული სისტემა შეუფერხებლად მუშაობდეს. სწორედ, საწვავი სისტემის მთავარი კომპონენტების დიაგნოსტირების და შეკეთების ახალი დანადგარები გვაძლევს საშუალებას დავადგინოთ თუ რა სახის დაზიანებასთან გვაქვს საქმე, განვსაზღვროთ დაზიანების ხარისხი და საჭიროების შესაბამისად განვახორციელოთ ამ კომპონენტების რემონტი. აღნიშნული დანადგარები ხელმისაწვდომია როგორც კატის, ასევე სხვა ბრენდების სპეც ტექნიკის მფლობელებისთვის.
– რა უპირატესობებს სთავაზობს დანადგარი მომხმარებელს და ზოგადად რა მდგომარეობაა საქართველოს ბაზარზე ამ მიმართულებით?
– დღესდღეობით ჩვენი ბაზარი არ არის გაჯერებული აღნიშნული სერვისით. ძირითადი პრობლემა კი მდგომარეობს კვალიფიციური კადრების ნაკლებობაში. ამჟამად ჩვენი ტექნიკოსები თურქეთში გადიან ტრეინინგებს, რათა მაქსიმალურად სრულჰყონ თავიანთი ცოდნა და საუკეთესო გადაწყვეტილებები შესთავაზონ ჩვენს მომხმარებლებს. რაც შეეხება აღნიშნული სერვისის უპირატესობებს, საწვავი სისტემის სწორი დიაგნოსტიკა მომხმარებელს საშუალებას აძლევს დაზოგოს ხარჯები და რაც ყველაზე მთავარია, შეამციროს ტექნიკის მოცდენის პერიოდი. გარდა ამისა, საგრძნობლად მცირდება საწვავის მოხმარება, რაც არანაკლებ მნიშვნელოვანი ფაქტორია მომხმარებლებისთვის.
– რამდენად ეკო მეგობრულია აღნიშნული დანადგარები?
– კომპანია ბორუსან კატი ჩართულია სოციალური პასუხისმგებლობის თემებში და ზრუნავს ეკოლოგიურ საკითხებზე. გამომდინარე იქიდან, რომ არასწორი წვის შედეგად წარმოიქმნება ნალექი და ჭვარტლი, რომლის რაოდენობაც გამონაბოლქვში საწვავის სისტემის დაბინძურების შესაბამისად იზრდება, მნიშვნელოვანია თითოეული კომპონენტის გამართული მუშაობა, რათა გამონაბოლქვის მიერ მიყენებული ზიანი ეკოლოგიისთვის მინიმუმამდე იყოს დაყვანილი. სწორედ ეს დანადგარები გვაძლევს საშუალებას აღმოვაჩინოთ მსგავსი დაზიანებები და პრობლემური კერები და დროულად განვახორციელოთ დაზიანებული კომპონენტების შეკეთება.
(R)