ნავთობისა და გაზის გიგანტი BP ბრიტანულ ქალაქ აბერდინის წყალბადის ამბიციების კომერციული პარტნიორი გახდა. ინფორმაციას BBC ავრცელებს.
აბერდინი მთავარი საზღვაო, ნავთობსამრეწველო და თევზსარეწი პორტი და სიდიდით მესამე ქალაქია შოტლანდიაში. უკვე კეთდება პროგნოზები, რომ თუკი ქალაქი წყალბადის ენერგიის წამყვანი ცენტრი გახდება, 10 წლის განმავლობაში ასობით სამუშაო ადგილი შეიქმნება. აბერდინის საკრებულოს ქალაქის განვითარებისა და რესურსების კომიტეტმა BP-ისთან პარტნიორობას მხარი დაუჭირა.
ქალაქს უკვე ჰყავს ორსართულიანი ავტობუსების პარკი, რომლებიც წყალბადზე მუშაობენ. BP, როგორც წიაღისეული საწვავის ინდუსტრიის ძირითადი მოთამაშე, გარემოსდამცველების კრიტიკას ხშირად განიცდის, თუმცა კომპანიას არაერთხელ დაუმტკიცებია, რომ ინვესტიციებს განახლებად ენერგიაშიც ახორციელებს. ოქტომბერში Greenpeace-მა დიდი ბრიტანეთის მთავრობასთან სასამართლო დავა წააგო, რომელიც BP-ისთვის ჩრდილოეთ ზღვაში ნავთობის საბადოს ათვისების ნებართვას შეეხებოდა. აბერდინის სანაპიროს მახლობლად, ვორლიხის ზოლზე ბურღვის ნებართვა BP-მ 2018 წელს მიიღო.
ქალაქში იგეგმება, რომ აბერდინის წყალბადის ჰაბს მზის ენერგიის ელექტროსადგური ჰქონდეს, რომელიც დაერთებული იქნება მწვანე წყალბადის წარმოებისა და საწვავის შევსების ობიექტებთან. მწვანე წყალბადში იგულისხმება ის, რომ გაზი განახლებადი ენერგიისგან იწარმოება და არა სითბური გამონაბოლქვის მეთოდით.
„ეს არის უზარმაზარი განაცხადი აბერდინისთვის, რაც ჩვენი Net Zero Vision-ის კონცეფციას მხარს უჭერს. ასევე, გზას უხსნის ქალაქს, გახდეს მსოფლიო ლიდერი წყალბადზე დაფუძნებული მწვანე საწვავისა და ენერგიის წარმოებაში. აბერდინს მსოფლიოში წყალბადის პიონერი ქალაქის რეპუტაცია აქვს და BP-ისთან პარტნიორობით ვაპირებთ, აბერდინი „მწვანე ეკონომიკის“ აღდგენის სათავეში დავაყენოთ,“ - აცხადებს ქალაქის საბჭოს თავმჯდომარე, ჯენი ლეინგი.
BP-ის ბრიტანეთის ოფისის ხელმძღვანელი და ევროპის მიმართლების უფროსი ვიცე-პრეზიდენტი, ლუიზა კინგჰემი ამბობს, რომ კომპანია მზადაა, წარადგინოს ისეთი „ინტეგრირებული ენერგეტიკული გადაწყვეტილებები,“ როგორიც არის წყალბადის ჰაბი.
„ჩვენ მოუთმენლად ველით ამ საინტერესო პროექტის ფარგლებში ადგილობრივ ხელისუფლებასთან მუშაობას, რაშიც ვემყარებით ჩვენი თანამშრომლების უნარებსა და გამოცდილებას კომპლექსური ენერგეტიკული პროექტების განხორციელებაში,” - აცხადებს ლუიზა კინგჰემი.
საწყის ეტაპზე წყალბადის გამოყენებას ყველაზე მეტად მძიმე მრეწველობასა და მძიმე ტრანსპორტში, მათ შორის სატვირთო მანქანებში, ავტობუსებსა და რკინიგზაში ვარაუდობენ. მისი გამოყენება, ასევე, სახლების გათბობის სისტემაში არის შესაძლებელი, თუკი ტექნოლოგია ბუნებრივი აირის სისტემიდან გადასვლის საშუალებას იძლევა.
BPN.GE