ქვეყნის ბრენდის შექმნა საომარი მოქმედებების ფონზე - ამ თემაზე სასაუბროდ ლევან კობერიძემ თავის საავტორო გადაცემაში რადიო ,,კომერსანტის“ „ბრენდი საქართველო“ კომპანია „ჯეპრას“ მთავარი კონსულტანტი სოსო გალუმაშვილი მიიწვია.

ლევან კობერიძის თქმით, ჯერ კიდევ პარლამენტში მუშაობისას ჰქონდა ინიციატივა, ჩვენს ქვეყანას ყველა ენაზე ერქვას საქართველო, რაც  სხვადასხვა პერიოდში რიგმა ქვეყნებმა გააკეთეს, მათ შორის ლიეტუვამ.  

,,სამწუხაროდ, პარლამენტში ყოფნის დროს ამ მიმართულებით წინ ვერ წავიწიეთ. თუმცა ვაპირებ, რომ თანამოაზრეებთან ერთად ამას საკანონმდებლო ინიციატივის სახე მივცე, რის მცდელობაც ჩემამდეც ყოფილა, შეიძლება დავსხდეთ და ვიმსჯელოთ. მომწონს, როცა ქვეყანას თავისი ისტორიული სახელი ჰქვია ყველა ენაზე, რაც ლიეტუვამ გააკეთა, მისასალმებელი და საუკეთესოა. 

უკრაინის გამარჯვება გვინდა ყველას, მაგრამ ამასთან მინდა საქართველოს გამარჯვება, რაც მოითხოვს გონივრულად აზროვნებას, მსჯელობის და შეთანხმების საფუძველზე. ცხადია, არ მომწონს, რომ თუნდაც უკრაინაში რუსეთის აგრესიის გამო ქვეყანა უფრო მეტად  პოლარიზდება. ერთ-ერთი უმთავრესი ამოცანა ქვეყნის ეკონომიკურად გაძლიერებაა. ამ მხრივ საუკეთესოა  ისრაელის მაგალითი და პოზიციები კრიტიკულ სიტუაციაში - როგორც კი გარე საფრთხე იჩენს თავს,  ქვეყანა ერთი გუნდი ხდება.  საქართველო, შეიძლება ერის გამაერთიანებელი და პოლარიზაციის დასასრული არ იყოს, მაგრამ სერიოზული  განაცხადია, რომ მას სურს თავისი ისტორიული სახელით წარსდგეს მსოფლიოს წინაშე“, - განაცხადა ლევან კობერიძემ.

ასევე ითქვა, რომ საქართველოში არ არსებობს საჯარო შეხვედრების ადგილი, სადაც შესაძლებელი იქნება ყველა თემაზე გახსნილად საუბარი.

,,თავიდან მეგონა, რომ საზოგადოების შეხვედრის ადგილი სოციალური ქსელი იქნებოდა, მაგრამ ის ორთაბრძოლის ადგილად გადაიქცა, სადაც ერთმანეთის აზრს არავინ არ სცემს პატივს. იმის ნაცვლად, რომ  ახალ წიგნებზე ვსაუბრობდეთ, პანდემიისა და  ომის თემას ვერ გავცდით.  ამ მხრივ ძალიან მენიშნა დანიელ კოლემანის წიგნი ,,ხმაური“, სადაც ავტორი ზოგადად ლაპარაკობს, თუ როგორ უშლის გარემო და არსებული ფაქტორები სწორი მიმართულებით სვლას და სწორედ ეს არის დღეს ქართულ რეალობაში. არსებობს პრობლემა და შეგვიძლია შევქმნათ ერთიანობის პლატფორმა, რის გარშემოც შეიძლება გაერთიანება. ბრენდი, როგორც  პლატფორმა რომ შექმნა,  რაღაცასთან შეთანხმებას უნდა მიაღწიო, მაგრამ ვერ ვაღწევთ, რადგან ჯანსაღი კომუნიკაციის სიმცირეა. კოლემანი შემთხვევით არ ვახსენე, ის ამბობს, რომ ფოკუსირება არის ერთ-ერთი ყველაზე მნიშვნელოვანი, როცა შეგიძლია მსჯელობის დროს პარტნიორთან, მოწინააღმდეგე მხარესთან მიხვიდე. წარმატებაზე საუბარი ზედმეტია, როდესაც ინტერეს ჯგუფები ერთმანეთში არ საუბრობენ. შეიძლება, კონკრეტულ საკითხებზე ვერ ვთანხმდებოდეთ, მაგრამ ეკონომიკური ძლიერება, კულტურის გაძლიერება, ძირითად თემებზე შეთანხმება შესაძლებელია“, - განმარტა სოსო გალუმაშვილმა გადაცემაში საუბრისას.

ცნობისთვის, საქართველო მსოფლიოს რამდენიმე ენაზე ითარგმნება როგორც ჯორჯია (Georgia), ყოფილი საბჭოთა კავშირის ქვეყნებში კი რუსული ენის გავლენით საქართველო ძირითადად ითარგმნება როგორც გრუზია. ამასთან, საქართველო წარმოითქმის როგორც გრუზია იაპონურად, ვიეტნამურად და კორეულად.

მარი ჩიტაია