დიდი ბრიტანეთის სანქციების სიაში მილიარდერ რომან აბრამოვიჩისა და მისი პარტნიორების მეტალურგიული კომპანია, Evraz მოხვდა. სანქციათა განახლებული სია ბრიტანეთის მთავრობის ოფიციალურ ვებგვერდზე გამოქვეყნდა, რომელშიც Evraz ერთადერთი ახალი კომპანიაა.
სანქციების თანახმად, კომპანიის აქტივები დიდ ბრიტანეთში გაიყინება, რაც იმას ნიშნავს, რომ ბრიტანეთის მოქალაქეებს მასთან ბიზნესის წარმოება ეკრძალებათ. Evraz-ის წინააღმდეგ სანქციების მიზეზები არ სახელდება, თუმცა დიდი ბრიტანეთის მთავრობა აცხადებს, რომ კომპანია ოპერირებს ეკონომიკის ისეთ სექტორებში, რომლებსაც სტრატეგიული მნიშვნელობა აქვს რუსეთის ხელისუფლებისთვის.
Evraz Plc რეგისტრირებულია დიდ ბრიტანეთში, სადაც მისი სათაო ოფისი მდებარეობს, თუმცა მისი ძირითადი საწარმოო ობიექტები რუსეთშია. კომპანიის ვებგვერდზე გამოქვეყნებული მონაცემებით, 2022 წლის 16 თებერვლის მდგომარეობით, Evraz-ის უმსხვილესი აქციონერები არიან მილიარდერი, რომან აბრამოვიჩი (28,64%) და მისი პარტნიორები, ალექსანდრე აბრამოვი (Abiglaze, 19,32%) და ალექსანდრე ფროლოვი (Crosland Global Limited, 9,65%). აბრამოვიჩი Evraz-ის პირდაპირი აქციონერი მიმდინარე წლის თებერვალში გახდა, როცა ხელახლა დაარეგისტრირა აქციები, რომელსაც მანამდე ირიბად ოფშორის საშუალებით ფლობდა. ამის შესახებ 17 თებერვალს გახდა ცნობილი.
10 მარტს რომან აბრამოვიჩი, მილიარდერ ოლეგ დერიპასკასთან ერთად, ბრიტანეთის სანქციების ქვეშ მოექცა. დიდ ბრიტანეთში მათი აქტივები გაიყინა, აეკრძალათ ტრანზაქციები გაერთიანებული სამეფოს მოქალაქეებთან და ქვეყანაში რეგისტრირებულ ორგანიზაციებთან, ასევე, უარი ეთქვათ დიდ ბრიტანეთში შესვლაზე და სატრანსპორტო სანქციები დაუწესდათ. სანქციების სიაში აბრამოვიჩის შეყვანის შემდეგ ყველა არააღმასრულებელმა დირექტორმა, მათ შორის აბრამოვმა, ფროლოვმა და აბრამოვიჩის კიდევ ერთმა ბიზნესპარტნიორმა, ევგენი შვიდლერმა Evraz-ის დირექტორთა საბჭო დატოვეს. თავად შვიდლერი ბრიტანეთის სანქციების ქვეშ 24 მარტიდან იმყოფება.
რომან აბრამოვიჩმა ჯერ კიდევ სანქციების სიაში მოხვედრამდე დაიწყო თავისი საფეხბურთო კლუბ „ჩელსის“ გაყიდვის პროცესი, თუმცა 5 მაისის მდგომარეობით, გარიგება ჯერ არ გამოცხადებულა. აბრამოვიჩზე, ასევე, ევროკავშირის, კანადისა და ავსტრალიის მხრიდან დაწესებული პერსონალური სანქციები მოქმედებს.