ბრიტანელი იან მალქოლმ ჰოქი თიბისი ბანკისგან ორი თვეა ელოდება პასუხს წერილზე, რომელიც მისმა ადვოკატმა დიმიტრი ტორაძემ თებერვლის შუა რიცხვებში გაუგზავნა ბანკის მენეჯმენტს. საქმე ეხება ბრიტანელი აქციონერის მოთხოვნას, ბანკმა მამუკა ხაზარაძესა და ბადრი ჯაფარიძეს აანაზღაურებინოს საფინანსო ინსტიტუტის აქციონერებისთვის მიყენებული $40–მილიონიანი ზარალი.
„წერილობით მივმართეთ ბანკს, ოფიციალურად ვაცნობეთ ჩვენი მოთხოვნების შესახებ და მივუთითეთ ამ მოთხოვნათა სამართლებრივი საფუძვლები, გამოვხატეთ კოოპერაციის და თანამშრომლობის სრული მზადყოფნა და უკვე 2 თვეზე მეტია, ველოდებით პასუხს“, – აღნიშნავს დიმიტრი ტორაძე.
მისივე თქმით, ბანკიდან დაუკავშირდნენ, თუმცა ჯერ ამ კომუნიკაციის დეტალებზე არ სურს საუბარი. რაც შეეხება პასუხის დროს, ადვოკატის თქმით, ყველა პროცედურას თავისი კანონიერი ვადები აქვს – „ჩვენც ველოდებით“.
„ამ ეტაპზე მე დეტალებზე ვერ ვისაუბრებ, რადგან ვიცავ ჩემი მარწმუნებლის კანონიერ ინტერესებს. ბანკს პასუხისთვის აქვს კანონით გათვალისწინებული ვადები და შესაბამისად ვიმოქმედებთ ამ ვადის გასვლის შემდეგ“, – აცხადებს დიმიტრი ტორაძე.
ბრიტანელი აქციონერი იან მალქოლმ ჰოქი თიბისი ბანკს მამუკა ხაზარაძისა და ბადრი ჯაფარიძის მიერ ბანკის აქციონერებისთვის მიყენებულ $40–მილიონიანი ზარალის ანაზღაურებას ითხოვს.
ცნობისთვის, ხაზარაძე–ჯაფარიძის საქმის მასალების თანახმად, 2008 წლის აპრილსა და მაისში, ავთანდილ წერეთლის მიერ დაფუძნებულმა შპს „სამგორი თრეიდმა და შპს „სამგორი M-მა, თითქოსდა კომპანიების საბრუნავი სახსრების შევსების მიზნით, „თიბისი ბანკისგან სესხის სახით მიიღეს 16 664 000 აშშ დოლარი.
იმავე დღეს აღნიშნული თანხა სრულად გადაირიცხა მამუკა ხაზარაძისა და ბადრი ჯაფარიძის პირად საბანკო ანგარიშებზე, მიუხედავად იმისა, რომ სესხი თითქოსდა ბიზნესის ბრუნვისთვის იყო მოთხოვნილი.
2008 წლის ოქტომბერ-ნოემბერში კომპანიებს „სამგორი M-სა და „სამგორი თრეიდს სესხის გადახდის ვადა გაეზარდათ ერთი წლით ისე, რომ სესხის დაფარვაც კი არ იყო დაწყებული. ხოლო 2008 წლის 31 დეკემბერს სესხის გადახდის ვალდებულების დადგომამდე, „თიბისი ბანკმა სესხს მიანიჭა უიმედო კრედიტის კლასიფიკაცია, შემდეგ კი უსაფუძვლოდ ჩამოწერა იგი და გადაიტანა შიდა ბალანსზე.
მილიონების დაბრუნება საკუთარ თავზე აიღო კომპანიამ, რომელიც ერთი თვით ადრე დარეგისტრირდა ოფშორულ ზონაში და რომელსაც არანაირი ფინანსური აქტივი არ გააჩნდა საქართველოში. ამ კომპანიამ მიიღო უფლება, მოეთხოვა ფული ხაზარაძისა და ჯაფარიძისგან.
კომპანიებს „სამგორი M-სა და „სამგორი თრეიდს“ კრედიტი ამ დრომდე არ დაუბრუნებიათ.
(R)