დიდი ბრიტანეთი უკრაინას დამატებით £1.3 მილიარდის ღირებულების სამხედრო დახმარებას გამოუყოფს. 

ბრიტანეთის მთავრობის განცხადებით, უკრაინის დამატებითი სამხედრო დახმარების პაკეტისთვის ქვეყანა საგანგებო სიტუაციების რეზერვებს გამოიყენებს. 

"პუტინის სასტიკი ომი არამხოლოდ უკრაინას ანადგურებს, არამედ საფრთხეს უქმნის მშვიდობასა და უსაფრთხოებას მთელ ევროპაში" - თქვა ბრიტანეთის პრემიერმინისტრმა, ბორის ჯონსონმა. 

შეგახსენებთ, გასულ კვირას, ბორის ჯონსონმა უკრაინის რადასთვის მიმართვისას თქვა, რომ დიდი ბრიტანეთი უკრაინის სამხედრო დახმარებისთვის დამატებით £300 მილიონს გამოყოფს. აღნიშნული სამხედრო დახმარების პაკეტი ელექტრონულ საბრძოლო აღჭურვილობას, ბატარეის საწინააღმდეგო სარადარო სისტემას, GPS-ის ჩამკეტებსა და ღამის ხედვის მოწყობილობებს მოიცავდა.

ცნობისთვის, დიდმა ბრიტანეთმა აქამდე უკრაინაში 100 მილიონი ფუნტის ღირებულების მაღალი კალიბრის სამხედრო აღჭურვილობა გაგზავნა. ასევე, რამდენიმე ათეული NHS-ის სასწრაფო მანქანა.

გავრცელებული ინფორმაციით, დიდი ბრიტანეთი უკრაინას სარაკეტო სისტემებით აღჭურვილ ჯავშანტექნიკას გაუგზავნის.

ბრიტანეთის თავდაცვის სამინისტრომ სოლსბერის დაბლობზე Stormer HighVelocity Missile (HVM) ჯავშანტექნიკა გამოცადა. ამასთან ერთად, ბრიტანეთი უკრაინაში 13-ტონიანი მანქანებისა და C-17 სატრანსპორტო თვითმფრინავების გაგზავნას აპირებს.. 

Stormer დამზადებულია BAE Systems-ის მიერ. მის გასაშვებად სამი ადამიანია საჭირო და Starstreak რაკეტებს იყენებს.

აღსანიშნავია ისიც, რომ დიდი შვიდეულის ქვეყნების ლიდერები - დიდი ბრიტანეთი, კანადა, საფრანგეთი, გერმანია, იტალია, იაპონია და შეერთებული შტატები - უკრაინის პრეზიდენტ ვოლოდიმირ ზელენსკისთან დღეს, 8 მაისს ვიდეოკონფერენციას გამართავენ.