ბრიტანეთის აეროპორტებში ახალ 3D  სკანერებს დააყენებენ, რომელიც ბარგის უფრო დეტალურ სურათს იძლევა. მთავრობამ გადაწყვიტა, აეროპორტები ამ სკანერებით 2024 წლის ივნისამდე აღჭურვოს.  ეს ნიშნავს იმას, რომ მგზავრებს, რომლებიც ბრიტანეთიდან მიფრინავენ,  აღარ დასჭირდებათ  100მლ სითხის წესის დაცვა და ჩანთებიდან შემოწმების მიზნით ელექტრონული მოწყობილობების ამოღება.

3D  სკანერების დამონტაჟების თავდაპირველი ვადა პანდემიის გამო შეფერხდა.

ამჟამად მგზავრებს შეუძლიათ ხელბარგში იქონიონ სითხეები 100 მლ მოცულობის ჭურჭელში. აეროპორტში შემოწმებისას ეს ჭურჭელი უნდა იყოს შეფუთული გამჭვირვალე პლასტიკურ პაკეტში და უნდა მოთავსდეს დანარჩენი ბარგისგან განცალკევებით სკანერის ლენტზე, სითხის მაქსიმალური მოცულობა ერთ ადამიანზე არ უნდა აღემატებოდეს 1 ლიტრს.

ეს წესი 2006 წელს დაწესდა მას შემდეგ, რაც ბრიტანულმა პოლიციამ გამოავლინა შეთქმულება, რომლის მონაწილეებიც 10 თვითმფრინავის აფეთქებას სასმლის ბოთლებში დამალული ასაფეთქებელი ნივთიერებებით გეგმავდნენ. მას შემდეგ სითხის ტრანსპორტირებაზე შეზღუდვები მთელ მსოფლიოში დაწესდა.

ახალი სკანერები საავადმყოფოების კომპიუტერული ტომოგრაფიის აპარატების მსგავსია და ბარგის შიგთავსის უფრო მკვეთრ, 3 განზომილებიან გამოსახულებას იძლევა. მსგავსი სკანერების ტესტირება ლონდონის ჰითროუს აეროპორტში 2017 წელს დაიწყო.

ხელისუფლება იმედოვნებს, რომ ახალი ტექნოლოგია, რომელიც უკვე გამოიყენება აშშ-ს ზოგიერთ აეროპორტში, მკვეთრად შეამცირებს უსაფრთხოების კონტროლის რიგებს დიდი ბრიტანეთის აეროპორტებში.

არსებული წესებით, მგზავრებმა სითხეების მსგავსად, შემოწმებისას ჩანთიდან ასევე უნდა ამოიღონ პლანშეტები, ნოუთბუქები,  დიდი ფოტოაპარატები და ვიდეოკამერები - ეს ყველაფერი ძალიან მოქმედებს უსაფრთხოების კონტროლის გავლის ხანგრძლივობაზე. თუ მგზავრებს ჩანთიდან რამის ამოღება ავიწყდებათ, საჭირო ხდება ხელით შემოწმებაც, რაც ასევე ართულებს სიტუაციას.

ახალი სკანერების დამონტაჟების შემდეგ, ერთ ადამიანზე დაშვებული სითხის რაოდენობა 2 ლიტრამდე გაიზრდება და უსაფრთხოების შემოწმების დროს მგზავრებს ჩანთებიდან ელექტრონული მოწყობილობების ამოღება აღარ დასჭირდებათ.

ტრანსპორტის მინისტრმა მარკ ჰარპერმა თქვა, რომ ახალი ტექნოლოგია შეამცირებს სკრინინგის რიგის დროს, გააუმჯობესებს „მგზავრების კომფორტს და, რაც მთავარია, აღმოაჩენს პოტენციურ საფრთხეებს“.

3D სკანერის ტექნოლოგია რამდენიმე წელია გამოიყენება აშშ-ს აეროპორტებში, როგორიცაა ჰარტსფილდ-ჯექსონი ატლანტაში და ო ჰარე ჩიკაგოში. წელს ის დაინერგა ირლანდიაში, შენონის აეროპორტში, სადაც 100 მლ-ის წესი გაუქმდა. აეროპორტის ოფიციალურმა პირებმა განაცხადეს, რომ ამ ნაბიჯმა გაანახევრა მგზავრების უსაფრთხოების კონტროლის გავლის დრო.

ჯერჯერობით ბრიტანეთის აეროპორტებში 100 მლ-ის პრინციპი ნარჩუნდება იმ დრომდე, ვიდრე არ დასრულდება ახალი ტექნოლოგიების დანერგვა. გადაწყვეტილებას ტრანსპორტის სამინისტრო მიიღებს.

ბრიტანეთის ყოფილმა პრემიერ-მინისტრმა ბორის ჯონსონმა ჯერ კიდევ პანდემიამდე აეროპორტებს ახალ ტექნოლოგიაზე გადასვლის ვადად 2022 წლის ბოლო დაუწესა,  მაგრამ შემდეგ მგზავრების რაოდენობა მკვეთრად შემცირდა და გეგმების შეცვლა გადაწყდა.

საჰაერო ტრანსპორტის საერთაშორისო ასოციაციის (IATA) უახლესი მონაცემები სექტემბრის თვისთვის აჩვენებს, რომ მგზავრთა ნაკადმა მთელ მსოფლიოში მიაღწია 73%-ს იმ დონისა, რაც იყო კორონავირუსის პანდემიამდე.