ბრიტანეთის მთავრობამ BBC-ის დაფინანსება იმ ბრძანებულებით შეამცირა, რომელიც მაუწყებლობისთვის მოსახლეობის გადასახადს ორი წლით ყინავს. ინფორმაციას Mail on Sunday-ზე დაყრდნობით Reuters ავრცელებს.
ლიცენზიის გადამხდელებით დაფინანსებული ბრიტანული სამაუწყებლო კორპორაციის მომავალი პოლიტიკური დებატების მუდმივი თემაა. ახლახან პრემიერ-მინისტრ ბორის ჯონსონის მთავრობა მისი დაფინანსების რეფორმირების ინიციატივით გამოვიდა.
„მოელიან, რომ ინფლაცია აპრილში 30 წლის მაქსიმუმს, 6%-ს გადააჭარბებს, ამიტომ ლიცენზიის ღირებულების ამჟამინდელ, 159 ფუნტ სტერლინგზე (217,40 დოლარზე) გაყინვა მომხმარებლებს გარკვეულ შვებას მისცემს, რომლებიც ცხოვრების მკვეთრად მზარდ ხარჯებს ებრძვიან,“ - წერს Reuters.
თუმცა, სააგენტოს შეფასებით, ეს, ასევე, დიდი დარტყმას მიაყენებს BBC-ის ფინანსებს, რადგან ტელეკომპანია ცდილობს, კონკურენცია გაუწიოს კერძოდ დაფინანსებულ საინფორმაციო საშუალებებსა და Netflix-ის მსგავს გასართობი ნაკადის სერვისებს, რომლებიც გამომწერებით ფინანსდება.
ოპოზიციურმა ლეიბორისტულმა პარტიამ განაცხადა, რომ დაფინანსების შემცირება პოლიტიკურად მოტივირებულია.
„პრემიერ-მინისტრსა და კულტურის მდივანს, როგორც ჩანს, ჯოჯოხეთური სურვილი აქვთ, შეუტიონ ამ დიდ ბრიტანულ ინსტიტუტს, რადგან მათ არ მოსწონთ მისი ჟურნალისტიკა,“ - აცხადებს ლეიბორისტი კანონმდებელი და კულტურის პოლიტიკის ხელმძღვანელი, ლუსი პაუელი.
BBC-ის საინფორმაციო გამოშვებას გაერთიანებული სამეფოს პოლიტიკური პარტიები რეგულარულად აკრიტიკებენ. ბრექსიტის თემის გაშუქება, რასაც ჯონსონის მთავრობის პოლიტიკაში ცენტრალური ადგილი უკავია, დიდი ხანია, ევროკავშირის დატოვების მომხრეების მიერ ზედმეტად კრიტიკულად აღიქმება.
გასულ კვირას ერთ-ერთმა კონსერვატორმა კანონმდებელმა ისიც განაცხადა, რომ BBC-ის მიერ დაუნინგ სტრიტის რეზიდენციაში, ლოკდაუნის დროს გამართული სკანდალური წვეულების თემის აგორება პრემიერ-მინისტრის წინააღმდეგ „გადატრიალების მცდელობას“ წარმოადგენდა.
BPN.GE