1. მოგვიყევით თქვენი საგრანტო კონკურსის შესახებ?

ბრიტანულ-ქართული აკადემია აცხადებს უპრეცენდენტო საგრანტო კონკურსს მე-9, მე-10 და მე-11 კლასების მაღალი აკადემიური მოსწრების მქონე აქტიური და მოტივირებული მოსწავლეებისათვის, რომლებსაც სურთ შემოუერთდნენ ბრიტანულ-ქართული აკადემიის სასკოლო საზოგადოებას და სწავლა საერთაშორისო ბაკალავრიატის (IB) საშუალო და საბაზო საფეხურის (MYP და DP) ინგლისურენოვან პროგრამებზე გააგრძელონ 2022-23 აკადემიური წლიდან.

ბრიტანულ-ქართული აკადემიის დამფუძნებლის გრანტის სრული მოცულობა შეადგენს ორას ორმოცდაათიათას დოლარს (250 000$) და გადანაწილდება კონკურსში გამარჯვებულ თითეულ მოსწავლეზე სწავლის გადასახადის დასაფინანსებლად. საგრანტო კონკურსის ფინალისტები მიიღებენ 30%-დან 100% მდე ოდენობის გრანტს.

2. ვის შეუძლია კონკურსში მონაწილეობის მიღება?

საგრანტო კონკურსში მონაწილეობა შეუძლია მომავალი მეცხრე, მეათე და მეთერთმეტე კლასის ნებისმიერ მოსწავლეს, რომელსაც აქვს მაღალი აკადემიური მოსწრება და მოტივაცია ჩაერთოს ბრიტანულ-ქართული აკადემიის მრავალფეროვანი გამოწვევებით სავსე სასკოლო ცხოვრებაში.

სასწავლო გრანტი განკუთვნილია აკადემიაში სწავლის მთელ პერიოდზე და ყოველწლიურად განახლდება მოსწავლის აკადემური მოსწრების, პოზიტიური ქცევისა და სასკოლო პროექტებში ჩართულობის საფუძველზე.

3. როგორ ხდება მიღება?

მოსწავლეებმა, რომლებიც დაინტერესებულნი არიან საერთაშორისო ბაკალავრიატის პროგრამებზე სასწავლო გრანტის მოპოვებით, უნდა გაიარონ შემდგომი ეტაპები:

1. სააპლიკაციო ფორმის შევსება - https://forms.gle/XMFtCV2gKqJVdU9m9

არაუგვიანეს 5 აპრილის, 17:00 საათისა მოსწავლეებმა უნდა შეავსონ სააპლიკაციო ფორმა, თან დაურთონ სამოტივაციო წერილი (200-დან 400 სიტყვამდე) ინგლისურ ენაზე და 2020-21 და 2021-22 სასწავლო წლების ნიშნების ფურცელი (ნიშნების ფურცლის წარდგენა შესაძლებელია მიღების მომდევნო ეტაპებზეც).

2. ტესტირება  სკოლის კამპუსზე

სააპლიკაციო ფორმების განხილვის შემდეგ, შერჩეულ მოსწავლეებს გაეგზავნებათ ტესტირების განრიგი.

ტესტირება ჩატარდება სკოლის კამპუსზე შემდეგ საგნებში:

მეცხრე და მეათე კლასების მოსწავლეებისთვის (MYP პროგრამა)

• ქართული ენა და ლიტერატურა;
• ინგლისური ენა;
• მათემატიკა;
• ინტეგრირებული საზოგადოებრივი მეცნიერებები ან ინტეგრირებული საბუნებისმეტყველო მეცნიერებების ტესტი მოსწავლის არჩევანის შესაბამისად.

მეთერთმეტე კლასების მოსწავლეებისთვის (DP პროგრამა)

• ქართული ენა და ლიტერატურა;
• ინგლისური ენა;
• მათემატიკა;
• ქიმია ან ბიოლოგია მოსწავლის არჩევანის შესაბამისად;
• ინტეგრირებული საზოგადოებრივი მეცნიერებები ან ინტეგრირებული საბუნებისმეტყველო მეცნიერებების ტესტი მოსწავლის არჩევანის შესაბამისად.

3. გასაუბრება

ტესტირების შედეგებზე დაყრდნობით შერჩეულ მოსწავლეებს მოვიწვევთ გასაუბრებაზე აკადემიურ დირექტორთან და შესაბამისი პროგრამის კოორდინატორთან.

4. დეტალურად მოგვიყევით თქვენი პროგრამების შესახებ

საერთაშორისო ბაკალავრიატის პროგრამა (IB) არის სასკოლო განათლების საერთაშორისო პროგრამა, რომელიც უმაღლესი ხარისხის გამოწვევებით სავსე საგანმანათლებლო კურიკულუმს სთავაზობს მოსწავლეებს.

IB პროგრამების მიზანია, ხელი შეუწყოს მოსწავლეების კრიტიკული აზროვნებისა და პრობლემების გადაჭრის უნარების განვითარებას მრავალფეროვნების, საერთაშორისო აზროვნების, ცნობისმოყვარეობისა და ახალი აღმოჩენების მიმართ  სიყვარულის გაღვივებასთან ერთად.

IB პროგრამების კურსდამთავრებულებს შესაძლებლობა აქვთ სწავლა საუკეთესო საერთაშორისო უნივერსიტეტებში გააგრძელონ და მოიპოვონ სრული ან ნაწილობრივი დაფინანსება. IB-ის სადიპლომო პროგრამაზე მოპოვებული მაღალი შედეგები მოსწავლეებს მსოფლიოს არაერთ უნივერსიტეტსა და კოლეჯში მინიმუმ ერთწლიანი სასწავლო კრედიტის მოპოვების შესაძლებლობას აძლევს.

IB-ის დიპლომი აღიარებულია განათლების სამინისტროს მიერ, რაც მოსწავლეებს საქართველოს უნივერსიტეტებში სწავლის გაგრძელების შესაძლებლობასაც აძლევს.

MYP - საბაზო საფეხურის პროგრამა (6-10 კლასები)

MYP-ის მიზანია მოსწავლეებს გაუღრმავოს აკადემიური ცოდნა თითოეულ საგანში, მათ შორის ძირითად საგნებში მოსწავლეების მცირე ჯგუფებად დაყოფისა და დიფერენცირების სტრატეგიების გამოყენების გზით.

თითოეული საგნის სწავლების პროცესში განსაკუთრებული ყურადღება ეთმობა სამიზნე უნარების განვითარებას, რომლებიც მოსწავლეებს სამომავლო განათლების პროცესსა და სასწავლო ოთახებს მიღმა წარმატების მიღწევაში დაეხმარება.

მოსწავლეთა სათემო სერვისებსა და მოხალისეობრივ აქტივობებში ჩართულობა MYP-ის აუცილებელი კომპონენტია.  საბაზო საფეხურზე მოსწავლეები ჩართულნი არიან ინდივიდუალურ ან ჯგუფურ პროექტში, რომელიც მიმართულია მოსწავლეების მიერ სკოლაში ან ადგილობრივ თემში არსებული გამოწვევების იდენტიფიცირებისა და მათი გადაჭრის გზების მოძებნისკენ.

MYP-ის დამამთავრებელ მეათე კლასში მოსწავლე ქმნის პერსონალურ პროექტს, რომლის მომზადებისთვისაც ის იყენებს პროგრამის ფარგლებში ჩამოყალიბებულ ყველა უნარს, მიღებულ ცოდნას და კრეატიულად, შემოქმედებითად  წარმოაჩენს მათ ესეს, ხელოვნების ნიმუშის ან თვითგამოხატვის სხვა ფორმების საშუალებით.

მოსწავლეები, რომლებიც აკმაყოფილებენ საბაზო საფეხურის ყველა მოთხოვნას, მეათე კლასის დასასრულს იღებენ საბაზო საფეხურის პროგრამის დასრულების IB სერტიფიკატს.

DP - საშუალო საფეხურის სადიპლომო პროგრამა (11-12 კლასები)

საერთაშორისო ბაკალავრიატის სადიპლომო პროგრამა ორწლიანი საგანმანათლებლო პროგრამაა, რომელიც მოსწავლეებს საუნივერსიტეტო ცხოვრებისათვის ამზადებს. პროგრამა მოსწავლეებს დამოუკიდებლად აზროვნების, პრობლემების კრეატიული გზებით გადაჭრისა და სწრაფად ცვალებად გლობალურ სამყაროში წარმატებით ადაპტაციის უნარებს უვითარებს. ჰოლისტური განვითარების მიდგომით, მოსწავლეები მათ გარშემო არსებულ სამყაროს კვლევისა და  კრიტიკული ანალიზის გზით შეისწავლიან.

საგნობრივი ჯგუფების მრავალფეროვანი შემოთავაზებიდან მოსწავლე, საკუთარი ინტერესებისა და სამომავლო პროფესიის შესაბამისად, სადიპლომო პროგრამის კოორდინატორთან და საუნივერსიტეტო მრჩეველთან ერთად ირჩევს საგნებს, რომლებსაც ორი წლის განმავლობაში სწავლობს. მეთორმეტე კლასში, საერთაშორის ბაკალავრიატის ორგანიზაციის მიერ ჩატარებული გარე გამოცდების წარმატებით გადალახვის შემდეგ, მოსწავლე იღებს საერთაშორისო ბაკალავრიატის დიპლომს.

საგნობრივი ჯგუფების გარდა, პროგრამა მოიცავს  სამ სავალდებულო საგანს, რომელთა წარმატებით გადალახვაც ასევე გახლავთ დიპლომის აღების წინაპირობა:

1. Theory of Knowledge ანუ ცოდნის თეორიის საგნის ფარგლებში მოსწავლეები ცოდნის ფენომენს შეისწავლიან და აანალიზებენ, თუ საიდან ვიცით ის, რაც ვიცით და როგორ უკავშირდება თითოეული დისციპლინის ფარგლებში მიღებული ცოდნა ერთმანეთსა და რეალურ სამყაროს.
2. Extended Essay - ამ საგნის ფარგლებში მოსწავლეები ქმნიან კვლევით ნაშრომს, რომელიც მოსწავლეებს უნივერსიტეტში ჩაბარებამდე ამზადებს დამოუკიდებელი მუშაობისათვის.
3. Creativity, Activity, Services-ის საგნის ფარგლებში მოსწავლეები ერთვებიან მრავალფეროვან სავალდებულო კლასგარეშე აქტივობებში, მათ შორის, თავად აორგანიზებენ თემის განვითარებაზე მიმართულ პროექტებს, საქველმოქმედო და კრეატიულ ღონისძიებს.

(R)