საბერძნეთ-ბულგარეთის ინტერკონექტორი (Interconnector Greece-Bulgaria-IGB) გაზსადენი დღეს ოფიციალურად გაიხსნა, რომელიც გაზის სამხრეთ დერეფნის ახალი განშტოებაა. მისი მეშვეობით აზერბაიჯანული გაზი ბულგარეთში გადაიქაჩება. ინფორმაციას სააგენტო, Trend ავრცელებს.
გახსნის ცერემონიაზე საპროექტო კომპანია ICGB AD-ის აღმასრულებელმა დირექტორმა ბერძნული მხრიდან, კონსტანტინოს კარაიანაკოსმა განაცხადა, რომ საბერძნეთ-ბულგარეთის ინტერკონექტორი (IGB) სამხრეთ-აღმოსავლეთ ევროპის ენერგეტიკულ რუკას შეცვლის.
ღონისიძიება საბერძნეთის ქალაქ კომოტინის მახლობლად გაიმართა, სადაც ინტერკონექტორი საბერძნეთის გაზგამანაწილებელ ქსელს და ტრანსადრიატიკის გაზსადენს, TAP-ს (Trans Adriatic Pipeline) უკავშირდება. პროექტის ძირითადი ეტაპის დასრულების შესახებ ICGB-ის აღმასრულებელმა დირექტორებმა ბულგარეთის მხრიდან, თეოდორა გეორგიევამ და კონსტანტინოს კარაიანაკოსმა ერთობლივად გამოაცხადეს. მათ ხაზგასმით აღნიშნეს, რომ IGB-ის მილსადენს დიდი მნიშვნელობა აქვს და ის საბერძნეთ-ბულგარეთის ეროვნულ საზღვრებს სცდება.
თეოდორა გეორგიევას თქმით, ბულგარეთს გაუჩნდა შესაძლებლობა, გაზის მიწოდება დასავლეთ ბალკანეთში, ასევე, მოლდოვასა და უკრაინაში უზრუნველყოს, ხოლო კონსტანტინოს კარაიანაკოსისი ამბობს, რომ IGB ბულგარეთისთვის გაზის მიწოდებას ახალი წყაროებიდან უზრუნველყოფს, რაც ქვეყნის ენერგეტიკული უსაფრთხოების ძირითადი ელემენტი და გაზის წყაროების დივერსიფიკაციის ეროვნული გეგმის ნაწილია. IGB თავიდანვე სხვა საკვანძო პროექტებთან, TAP-თან და TANAP-თან, ასევე, ალექსანდრუპოლისის LNG ტერმინალთან ერთად შემუშავდა, რაც, კარაიანაკოსისის შეფასებით, მას ევროპის საერთო ენერგეტიკული სტრატეგიისა და პრიორიტეტების განუყოფელ ნაწილად აქცევს.
„ჩვენ ამ პროექტზე მუშაობა სრულიად განსხვავებულ საერთაშორისო გარემოში დავიწყეთ, დღეს კი IGB იმაზე მეტად საჭირო და მნიშვნელოვანია, ვიდრე ოდესმე ყოფილა,“ - აცხადებს კონსტანტინოს კარაიანაკოსი.
აზერბაიჯანის ენერგეტიკის მინისტრ ფარვიზ შაჰბაზოვის შეფასებით, IGB ინტერკონექტორის ექსპლუატაციაში გაშვება სტრატეგიულად მნიშვნელოვანი მოვლენაა გაზის სამხრეთ დერეფნის გაფართოების, ასევე, ენერგომომარაგების დივერსიფიკაციის ახალი პროექტების განსახორციელებლად როგორც ბულგარეთში, ისე სამხრეთ-აღმოსავლეთ ევროპაში. მისი თქმით, ამ პროექტის განხორციელება TAP გაზსადენის შემდგომი განვითარების თვალსაზრისით მეტად მნიშვნელოვანია.
მინისტრის მონაცემებით, წელიწადზე მეტია, რაც ევროპას 13,5 მილიარდი კუბური მეტრი აზერბაიჯანული გაზი მიეწოდება. აქედან საბერძნეთის წილი 1,4 მილიარდ კუბურ მეტრს, ბულგარეთის კი - 440 მილიონ კუბურ მეტრ გაზს შეადგენს. 2022 წლის იანვარ-ივნისში ბულგარეთში გაზის ექსპორტმა 160 მილიონი კუბური მეტრი შეადგინა, წლის ბოლომდე კი მიწოდების 600 მილიონ კუბურ მეტრამდე გაზრდა იგეგმება. აზერბაიჯანი ბულგარეთში 1 ივლისიდან ყოველდღიურად 2,6 მილიონი კუბური მეტრი ბუნებრივი აირის ექსპორტს ეწევა, რაც მიწოდების 1,7 მილიონი კუბური მეტრით ზრდას ნიშნავს.
IGB-ის სატუმბი სიმძლავრე 3 მილიარდ კუბურ მეტრს შეადგენს, რომელსაც 5 მილიარდ კუბურ მეტრამდე გაზრდის რესურსი აქვს. ინტერკონექტორის გამტარუნარიანობის ნახევარი უკვე დაჯავშნილია.
2013 წლის სექტემბერში Bulgargaz EAD-მა „შაჰ-დენიზ 2“-ის საბადოდან წელიწადში მილიარდი კუბური მეტრი გაზის შესყიდვაზე 25-წლიან კონტრაქტს მოაწერა ხელი, ხოლო 2019 წლის მაისში ბულგარეთის ქალაქ კირკოვოში IGB ინტერკონექტორის მშენებლობას საფუძველი ჩაეყარა.
გაზსადენი
