ავტობუსი, რომელშიც ბულგარეთის ნაკრების ფეხბურთელები იმყოფებოდნენ, თბილისში ავტოსაგზაო შემთხვევაში მოხვდა - შედეგად ერთი ფეხბურთელო, ტოდორ ნედელევი დაშავდა.
როგორც ბულგარეთის საფეხბურთო კავშირის მიერ გავრცელებულ განცხადებაში ვკითხულობთ, მძიმე ავტოსაგზაო შემთხვევა თბილისში ჩამოსვლის შემდეგ, სასტუმროსკენ მიმავალ გზაზე მოხდა - ორი ავტობუსის მძღოლიდან ერთ-ერთმა საჭეზე კონტროლი დაკარგა.
თოდორ ნედელევი ავტობუსის უკანა სავარძელზე იჯდა. როგორც ბულგარული პრესა წერს, ფეხბურთელს თავის არეში აქვს დაზიანებები, რადგან მინის ნატეხი მოხვდა.
მათივე ცნობით, დაშავებული ფეხბურთელი, ტოდორ ნედელევი კლინიკაშია გადაყვანილი, სადაც გამოკვლევები უტარდება. ნაკრების სხვა ფეხბურთელები და ავტობუსში მყოფი გუნდის სხვა წევრები თავს კარგად გრძნობენ.
ავარიის შედეგად დაშავებულ ბულგარელ ფეხბურთელს თოდორ ნედელევს თბილისში, ინგოროყვას კლინიკაში ოპერაცია ჩაუტარდა. ოპერაცია 2 საათზე მეტხანს მიმდინარეობდა.
თოდორ ნედელევი თბილისში ექიმების მეთვალყურეობის ქვეშ ერთი კვირა დარჩება. ბულგარული პრესის ინფორმაციით, ფეხბურთელის სიცოცხლეს საფრთხე არ ემუქრება,თუმცა მას კიდევ არაერთი კვლევა დასჭირდება. მასთან ერთად საავადმყოფოში იმყოფება ეროვნული ნაკრების ექიმი ბისერ ბოჩევი, რომელიც ფეხბურთელის ჯანმრთელობის მდგომარეობას აკონტროლებს.
დამატებითი ინფორმაციის გარკვევას შსს-ში ვცდილობთ - დეტალებს მიღებისთანავე შემოგთავაზებთ.
ბულგარეთის ნაკრები საქართველოს ნაკრებს კვირას, 12 ივნისს უნდა შეხვდეს.
როგორც ცნობილია, ამ ეტაპზე მატჩის გადადება არ იგეგმება. საქართველო-ბულგარეთის შეხვედრა ხვალ, "დინამო არენაზე", 20:00 საათზე დაიწყება.