თვითმფრინავების ლიზინგის ერთ-ერთმა უმსხვილესმა ოპერატორმა Carlyle Aviation-მა (Carlyle Group-ის სტრუქტურა) სადაზღვევო კომპანიების და გადამზღვეველთა ჯგუფის წინააღმდეგ სარჩელი შეიტანა. Carlyle Aviation-ი მათ ბრალს, რომ რუსული ავიაკომპანიების მიერ თვითმფრინავების დაბრუნებაზე უარის თქმის გამო, ზარალი არ აუნაზღაურეს. ამის შესახებ Bloomberg და Financial Times წერენ.
კომპანია 700 მილიონ დოლარს ითხოვს სადაზღვევო კომპანიებისგან, განუცხადა FT-ს საქმის მცოდნე წყარომ. Bloomberg აღნიშნავს, რომ კომპანია რუსეთში დარჩენილ თვითმფრინავებს ასობით მილიონ დოლარად აფასებს.
Carlyle Aviation-მა თავის დროზე რუსულ ავიაკომპანიებს იჯარით 23 თვითმფრინავი გადასცა. კომპანიის კლიენტებს შორის არიან რუსული ავიაკომპანიები NordStar, Azur Airlines, Utair და Izhavia. სარჩელიდან ირკვევა, რომ თებერვლის ბოლოს კომპანიებმა მეიჯარეს აცნობეს, რომ სანქციების და რუსეთის მთავრობის განკარგულების ფონზე თვითმფრინავის დაბრუნებას ვერ ახერხებდნენ.
Bloomberg-ი წერს, რომ სარჩელი შეიტანეს „ათზე მეტი“ სადაზღვევო და გადაზღვევის კომპანიის წინააღმდეგ, Financial Times - 35 მოპასუხის წინააღმდეგ. ირკვევა, რომ მოპასუხეები არიან American International Group UK (AIG), Chubb European Group, Berkshire Hathaway International Insurance, AXIS Capital და სხვები.
Carlyle Aviation მიუთითებს, რომ მან მზღვეველებს მიმდინარე წლის მარტში მიმართა, მაგრამ კომპანიებმა დაარღვიეს კონტრაქტები და ვერ შეასრულეს ანაზღაურების ვალდებულება, მიუხედავად კვარტალური სადაზღვევო პრემიებისა.
„სახელშეკრულებო ვალდებულებების აშკარა დარღვევის გამო, რამდენიმე თვის შემდეგ, რაც Carlyle-მა პირველად აცნობა მოპასუხეებს მიყენებული ზარალის შესახებ, მოპასუხეებმა არ დაფარეს ეს ზარალი“, ნათქვამია სარჩელში.
როგორც Carlyle-ში აცხადებენ, სხვა განმცხადებლები, რომელთა თვითმფრინავებიც რუსული ავიაკომპანიების კონტროლის ქვეშ იმყოფებოდა, მზღვეველების მხრიდან მსგავსი რეაქცია მიიღეს.
როგორც ცნობილია, თებერვლის ბოლოს აშშ-მ, ევროკავშირმა, დიდმა ბრიტანეთმა და სხვა სახელმწიფოებმა დაკეტეს საჰაერო სივრცე რუსული თვითმფრინავებისთვის. რუსეთის წინააღმდეგ ასევე დაწესდა საერთაშორისო სანქციების რამდენიმე პაკეტი, რომლებიც, სხვა საკითხებთან ერთად, კრძალავდა რუსული კომპანიებისთვის თვითმფრინავებისა და სათადარიგო ნაწილების მიყიდვას. ასევე აიკრძალა სადაზღვევო და საჰაერო ხომალდის ტექნიკური მომსახურების გაწევა.
სალიზინგო კომპანიებმა დაიწყეს რუსული ავიაკომპანიების მიერ იჯარით აღებული საჰაერო ხომალდების უცხოეთის აეროპორტებში დაკავება.
მარტის დასაწყისისთვის რუსული ავიაკომპანიების საჰაერო ხომალდების ნახევარზე მეტი იყო უცხოურ რეესტრებში -ანუ 367-დან 739 ბორტი. იმავე თვის შუა რიცხვებში პრეზიდენტმა ვლადიმერ პუტინმა რუსულ რეესტრში ამ თვითმფრინავების ხელახალი რეგისტრაცია დაუშვა.