მსოფლიოს უმსხვილესი საცალო მოვაჭრე Carrefour მიმდინარე წელს დამაჯერებლად უყურებს, რადგან 1,23 მლრდ ევროს (1,40 მლრდ დოლარის) რეკორდული თავისუფალი ფულადი ნაკადი (Free cash flow-FCF) დააფიქსირა. ამასთან, კომპანიის ოპერაციული მოგება 2021 წელს 7,7%-ით გაიზარდა. ამის შესახებ საცალო მოვაჭრის განცხადებაში არის ნათქვამი, რასაც Reuters ავრცელებს.

Carrefour-ის აღმასრულებელი დირექტორი, ალექსანდრე ბომპარდი აცხადებს, რომ ფულადი სახსრების გამომუშავება 2022 წელს მილიარდ ევროზე ზედა დონეზე დარჩება და ინფლაციური ზეწოლის მიუხედავად, კარგი კომერციული იმპულსი შენარჩუნდება. მან, ასევე, აღნიშნა, რომ ჯგუფის ახალ სტრატეგიულ გეგმას შემოდგომაზე გამოაქვეყნებს.

ძლიერმა შედეგებმა და ფულადი სახსრების გამომუშავებამ Carrefour-ს საშუალება მისცა, ინვესტორებისთვის დივიდენდების 8%-მდე, თითო აქციაზე 0,52 ევრომდე გაზრდა შეეთვაზებინა და მიმდინარე წლისთვის 750 მლნ ევროს აქციების გამოსყიდვის გეგმა ჩაეშვა.

„ახალი საშემოდგომო გეგმით, ეს ჩვენთვის მეტად საინტერესო დროა. ამ წელზე დიდ იმედებს ვამყარებთ," - აცხადებს ალექსანდრე ბომპარდი.

სურსათის საცალო ვაჭრობის ფრანგული კომპანიის გეგმებში ნაღდი ფული საკვანძო როლს ასრულებს, ასევე, ციფრული კომერციის გაფართოება-გაძლიერებისთვის დამატებითი ფინანსური რესურსების გარეშე. ეს უკვე მიღწეულიც იქნებოდა, რომ არა გასულ წელს კომპანიებთან გაერთიანების ორი ჩავარდნილი გეგმა, რომელიც კანადურ Couche-Tard-სა და ფრანგულ Auchan-ს შეეხება.

Carrefour აცხადებს, რომ 2021 წელს, ძირითადად, საფრანგეთის ბაზრის წყალობით, ოპერაციული მოგება 7.7%-ით გაიზარდა და 2.27 მლრდ ევროს მიაღწია. ეს შედეგი ასახავს ხარჯების შემცირებასა და 2021 წლის გაყიდვებს, რაც 2.3%-ით, 81.245 მლრდ ევრომდე გაიზარდა. ამასთან, კომპანიის ბაზრის წილი საკვანძო ქვეყნებში, საფრანგეთში, ბრაზილიასა და ესპანეთში გაიზარდა.

ალექსანდრე ბომპარდმა საფრანგეთის ჰიპერმარკეტებში შემცირებული გაყიდვების გამოცოცხლება პრიორიტეტად დაისახა და 1,8%-ით გაზარდა, რის შედეგადაც ფრანგულ ქსელში ოპერაციული მოგება 20%-ით, 757 მლნ ევრომდე გაიზარდა. Carrefour მოელის, რომ საფრანგეთის ქსელი, საშუალოვადიან პერიოდში, ოპერაციულ მარჟას 2021 წლის 2.1%-დან 3%-მდე კიდევ უფრო გააუმჯობესებს.

კომპანია, ინფლაციის აჩქარების პარალელურად, ხარჯების დაზოგვას გააძლიერებს. Carrefour-მა ხარჯების შემცირების მიზანი, 2021-23 წლების პერიოდში, ყოველწლიურად 2.7 მლრდ ევრომდე გაზარდა. საწყისი მიზანი 2.4 მლრდ ევროს შეადგენდა, რამაც 2021 წელს კომპანიას 930 მლნ ევროს დანაზოგი მოუტანა.

Carrefour ხუთწლიანი გეგმის ბოლო ეტაპზეა, რომელიც 2018 წლის იანვარში დაიწყო, რომ ხარჯები შეამციროს და ელექტრონული კომერციის ინვესტიციები გაზარდოს. კომპანია ცდილობს, ონლაინ კონკურენტებს გაუმკლავდეს, როგორიც არის Amazon, Lidl და Leclerc. ნოემბერში Carrefour-მა პირობა დადო, რომ 3 მლრდ ევროს 2022-2026 წლებში ციფრული ექსპანსიის გააქტიურებაში დახარჯავს.

Carrefour-ის აქციები წელს 7%-ით გაიზარდა, მაგრამ მაინც 20%-ით ნაკლებად ივაჭრება 2017 წლის ივლისის დონესთან შედარებით, როცა ალექსანდრე ბომპარდი მმართველობაში მოვიდა.

bpn.ge