Carrefour-მა სოციალური შოპინგისა და პირდაპირი ტრანსლაციის (livestreaming) სამყაროში შეაბიჯა. ასეთ შეფასებას პორტალი RetailDetail აკეთებს, რომლის ცნობითაც, გლობალურმა საცალო მოვაჭრემ ფრანგულ პოპულარულ მედია არხ Brut-თან ერთობლივი საწარმო Brut Shop შექმნა.

„Carrefour-ის მიზანია, Brut Shop სოციალური კომერციის სფეროში საფრანგეთის ბაზრის ლიდერი გახდეს, მიუხედავად იმისა, რომ გასაკეთებელი ჯერ კიდევ ბევრია,“ - წერს RetailDetail.

პორტალის ცნობით, ფრანგი ახალგაზრდებისთვის მედია არხი Brut ამერიკული ინტერნეტმედია Buzzfeed-ის ფრანგული ანალოგია. არხი სპეციალიზებულია ვიდეოების გადაღებაზე, რომლებიც სოციალური მედიის საშუალებით ვრცელდება და განსაკუთრებით პოპულარულია ახალგაზრდებში. Brut-ის თანახმად, მის ვიდეოებს 70 მილიონი მომხმარებელი უყურებს და მათგან ყველა 18-დან 34 წლამდეა. საინფორმაციო მედია ფრანგულ სოციალურ ქსელებში მედიაბაზრის 39%-ს შეადგენს.

Carrefour Group-ს თაყვანისმცემლების ამ დიდი ბაზის გამოყენება სურს, მითუმეტეს, საცალო მოვაჭრეს ონლაინ-შოპინგის გარკვეული გამოცდილება უკვე აქვს: გასულ წელს Carrefour-მა ორმოცდაათამდე ონლაინ ღონისძიება გამართა, რომელზეც მომხმარებლებს პროდუქტების შეკვეთა გადაცემის დროს, პირდაპირ ეთერში შეეძლოთ. მაგალითად, ამ კვირაში ვალენტინობის დღისადმი მიძღვნილი გადაცემა გაკეთდა, რომლის დროსაც, ვიბრატორებით დაწყებული და ლეპტოპებით დამთავრებული, ყველაფრის რეკლამირება ხდებოდა.

Brut Shop მომხმარებლებს საშუალებას მისცემს, ონლაინ შესყიდვები სოციალური ქსელების პირდაპირ ეთერში გადაცემულ ვიდეო ღონისძიებებში მონაწილეობის დროს განახორციელონ. Brut-ის გამოცდილებისა და ახალგაზრდებზე წვდომის წყალობით, ერთობლივი საწარმო Brut Shop იმედოვნებს, რომ სოციალური მედიის გაყიდვებში, ანუ სოციალურ კომერციაში საფრანგეთის ბაზრის ლიდერი გახდება.

Carrefour-ის თანახმად, ლაივ-შოპინგი ახალგაზრდა მომხმარებლებს მიიზიდავს, უზრუნველყოფს ელექტრონული კომერციის უფრო სწრაფ კონვერსიას და მომხმარებლის ლოიალობას გაზრდის. საფრანგეთში Carrefour-ის მომხმარებელთა 60% აცხადებს, რომ ლაივ-შოპინგით დაინტერესებულია. თუმცა Brut-ს ჯერ კიდევ ბევრი სამუშაო აქვს, რომ კონტენტი უფრო მიმზიდველი და აქტუალური გახდეს.