მსოფლიო ეკონომიკის მოცულობა მომავალ წელს პირველად გადააჭარბებს 100 ტრილიონ დოლარს. ამის შესახებ ბრიტანული საკონსულტაციო კომპანია Cebr-ის ანგარიშში არის ნათქვამი, რასაც Reuters ავრცელებს.

ანგარიშის მიხედვით, ჩინეთს დაგეგმილზე ოდნავ მეტი დრო დასჭირდება, რომ აშშ-ს, როგორც ნომერ პირველ ეკონომიკას, გადაუსწროს. Cebr-ის პროგნოზით, ჩინეთი დოლარში გამოხატულ წამყვან ეკონომიკად მსოფლიოში 2030 წელს გახდება, ანუ ორი წლით გვიან, ვიდრე შარშან მსოფლიო ეკონომიკური ლიგა (World Economic League) პროგნოზირებდა.

ინდოეთი მომავალ წელს საფრანგეთს, 2023 წელს კი ბრიტანეთს გაუსწრებს, რათა მსოფლიოს მეექვსე უდიდესი ეკონომიკის ადგილი დაიბრუნოს.

„2020-იანი წლების მნიშვნელოვანი გამოწვევა იქნება, თუ როგორ გაუმკლავდება მსოფლიო ეკონომიკა ინფლაციას, რომელმაც ამჟამად აშშ-ში 6.8%-ს მიაღწია. თუ ვერ გაუმკლავდა, მაშინ მსოფლიო 2023 ან 2024 წლებში რეცესიისთვის უნდა მოემზადოს,“ - აცხადებს Cebr-ის თავმჯდომარის მოადგილე, დუგლას მაკუილიამსი.

ანგარიშის მიხედვით, გერმანია ეკონომიკური წარმოების მოცულობის თვალსაზრისით იაპონიას 2033 წელს გაუსწრებს. რუსეთი უდიდესი ეკონომიკის ტოპ ათეულში შესაძლოა, 2036 წლისთვის შევიდეს. ამ სიაში მეცხრე ადგილს ინდონეზია 2034 წელს დაიკავებს.

BPN.GE