საქართველოში  ჩამოსული რუსი და ბელარუსი ტურისტები ძირითადად ძველი თბილისის სასტუმროებსა და აპარტამენტებში განთავსდნენ. როგორც ტურისტული კომპანია „ინვენიო თრეველის“ დამფუძნებელი და დირექტორი ნატალია კლიმიაშვილი ,,კომერსანტთან“ ამბობს, ძირითადად მოქალაქეების ის ნაწილი ჩამოვიდა, ვინც სანქციებს  გამოექცა. ზოგს არ უნდა, რომ ომში  გაიწვიონ, ზოგი -  საკუთარი ბიზნესის გადარჩენა ცდილობს.

მიიღე ინფორმაცია უფრო სწრაფად ჩვენს Telegram-ზე.

,,რუსეთიდან და ბელარუსიდან  შემოსულ მოქალაქეებს ტურისტები ნაკლებად ეთქმით. ისინი მცირე ხნით არ ჩამოსულან, ცდილობენ აქ მოიკიდონ ფეხი, რაღაც გაურკვეველი ვადით დარჩნენ საქართველოში.  ტურისტულად ნამდვილად არავინ არ ჩამოდის. თუმცა საკმაოდ შეძლებული ფენაა ჩამოსული, ძირითადად ძველი თბილისის სასტუმროებსა და აპარტამენტებში გადანაწილდნენ. ამ ფაქტის გამო საკმაოდ მოიმატა უძრავი ქონების ფასმა და ეს ეხება როგორც გაყიდვებს, ასევე ბინის ქირასაც, რომელიც ბოლო პერიოდში საგრძნობლად გაძვირდა. ათასობით ადამიანია ჩამოსული, დიდი ხნით სასტუმროებში ვერ გაჩერდებიან, ამიტომ ეძებენ  სახლებს, სადაც იცხოვრებენ, ამით სარგებლობს ბევრი და ფასს ზრდის. ხალხი ისედაც გაჭირვებულია პანდემიის გამო და ბევრი ამ სიტუაციით სარგებლობს“, - ამბობს ნატალია კლიმიაშვილი.

მისივე თქმით, საქართველოში შემოსული მოქალაქეების 30-40% ბელარუსები არიან, დანარჩენი 60-70% რუსეთის დიდი ქალაქებიდან,  მეტი წილი 40 წლამდე ასაკის ადამიანები არიან.

ტურისტული კომპანიის ხელმძღვანელი ასევე აღნიშნავს, რომ ტენდენცია არასახარბიელოა და აუცილებელია გარკვეული ზომების მიღება მთავრობის მხრიდან, რაც კანონმდებლობის დონეზე უნდა დალაგდეს.

,,ქვეყანაში დიდი ხნით შემოსულ ადამიანს თანდათან მეტი მოთხოვნა ექნება. ბუნებრივია, ცოტა ხანში რუსულენოვან სკოლებს და ბაღებს მოითხოვენ. მერე სხვა საჭიროებები გაჩნდება.  ეს მომავალში პრობლემას შექმნის, რაღაც ზომები უნდა მიიღონ, სავიზო რეჟიმი დაწესდეს და შეიზღუდოს მათ მიერ კომპანიების რეგისტრაცია, თუ  არ გვინდა პატარა ,,რუსეთი“  და ,,ბელარუსი“ გვქონდეს ქვეყანაში. კანონმდებლობის დონეზე უნდა დალაგდეს ეს სიტუაცია. როგორც კი უკრაინა გაიმარჯვებს ამ ომში, დალაგდება სიტუაცია და ისევ ფეხზე დავდგებით, მაგრამ ეს როდის მოხდება, არ ვიცით, ამიტომ ყველა ზომა უნდა მივიღოთ“, - აცხადებს კლიმიაშვილი ,,კომერსანტთან“.

შინაგან საქმეთა მინისტრის ვახტანგ გომელაურის ინფორმაციით,  24 თებერვლიდან 16 მარტის ჩათვლით საქართველოში შემოსულია რუსეთის 30 439 მოქალაქე, გასულია 17 801 ადამიანი. გამოდის, რომ შემოსული მოქალაქეებიდან დაახლოებით, 12 ათასი ადამიანი არ გასულა საქართველოდან.

მარი ჩიტაია