Charles Rullo (ჩაკ რულო), იგივე ჩაკი, ქართულ ბაზარზე პანდემიურ პერიოდში გამოჩნდა და მალევე მიიქცია ყურადღება. ჭაჭის ქართული ბრენდი სულ 1 წელია, დახლებზეა, მაგრამ მომხმარებელთა საკმაოდ ფართო წრე შეკრა და ბოლო დროის ერთ-ერთი მოთხოვნადი და პოპულარული სასმელია.
ბრენდი ახალგაზრდა მეწარმეებმა - ლევან ტურძელაძემ და ლევან ჩიკვაიძემ შექმნეს. სწორედ მათ მიაგნეს ჭაჭის აქამდე უცნობ არომატს და მომხმარებლების ოვაციაც დაიმსახურეს.
როგორც ლევან ჩიკვაიძე ,,კომერსანტთან ამბობს, Charles Rullo-ს გამოარჩევს უნიკალური სინთეზი - 40%-იანი რქაწითელის ყურძნის დისტილატის და ნატურალური შავი სტაფილოსი, რაც მას ვიზუალურად მიმზიდველს, რბილად დასალევს და განსაკუთრებით არომატულს ხდის.
,,ჩაკ რულოს“ თანადამფუძნებელი ლევან ჩიკვაიძე აცხადებს, რომ ახალ პროდუქტს აქვს პოტენციალი, თამამი სიტყვა თქვას საერთაშორისო ბაზარზე და უცხოელი მომხმარებლების ყურადღებაც მიიპყროს. ამ ამბიციით შეუდგა ახალი ქართული ჭაჭის შემქმნელთა გუნდი ექსპორტის მიმართულებით მუშაობას. ჩიკვაიძის თქმით, პირველი პარტია ექსპორტზე 2022 წელს გავა.
,,ბრენდის შექმნის იდეა ჯერ კიდევ 2017 წელს გაჩნდა. 2-3 წელი დასჭირდა უნიკალური რეცეპტის მიღებას, ჭაჭის ინსპირაციით — ოთხნახადი ჭაჭა, წელი დაგვჭირდა, რომ უნიკალური რეცეპტი მიგვეღო - ოთხნახადი, ნატურალური შავი სტაფილოს შეფერილობის, 40 გრადუსიანი, სასიამოვნო დასალევი როგორც ცალკე, ისე სხვადასხვა კოქტეილსა და მიქსერებთან. ამასთან, აღსანიშნავია მისი საინტერესო ბრენდის იდენტობაც, რაც ძალიან მიმზიდველს ხდის მომხმარებლისთვის.
ბაზარზე 2020 წელს გამოვჩნდით, თუმცა აქტიური გაყიდვები დაიწყო 2021 წელს, საკმაოდ რთული პერიოდი გამოვიარეთ პანდემიიდან გამომდინარე, გავრისკეთ და ვფიქრობთ, რომ ჩვენმა სვლამ გაამართლა. პანდემიურ პერიოდში საქმიანობას ახლდა ერთი პოზიტივიც - ბევრი ექსპერიმენტის ჩატარების საშუალება გვქონდა. თანდათან ჰორეკა სექტორიც გაიხსნა და ჩვენც უფრო და უფრო მოვძლიერდით. ჯერჯერობით შიდა ბაზარზე ვფართოვდებით, ხოლო უკვე წლის ბოლომდე შევძლებთ გასვლას ევროპულ და აზიურ ბაზრებზე, ვცდილობთ, ორივე მიმართულება მოვიცვათ“, - ამბობს ,,კომერსანტთან“ ლევან ჩიკვაიძე.
კომპანიის სამომავლო გეგმის შემუშავებაში, ექსპორტთან დაკავშირებით ,,ჩაკ რულოს“ მწარმოებლებს დაეხმარა სახელმწიფო სააგენტო ,,აწარმოე საქართველოში“, რომლის ფარგლებშიც კომპანიის წარმომადგენლებმა გაიარეს ექსპორტის მენეჯმენტის კურსი.
,,არც ერთ ჩვენგანს არ ჰქონდა ექსპორტის მიმართულებით გამოცდილება. მცირე მოკვლევის შემდეგ გავიარეთ სააგენტოს ექსპორტის მენეჯმენტის კურსი და გავეცანით ისეთ მნიშვნელოვან საკითხებს, როგორებიცაა საექსპორტო ლოგისტიკა, ხარისხის ინფრასტრუქტურა და ბიზნესკომუნიკაციის წარმოება პოტენციურ დამკვეთებთან. კურსის პროგრამა მაქსიმალურად მორგებულია საბაზრო მოთხოვნებზე. ვფიქრობთ, მივიღეთ ის თეორიული ცოდნა, რომელიც აუცილებლად დაგვეხმარება ჩვენი უნიკალური ბრენდი და პროდუქტი სხვადასხვა ქვეყნის მომხმარებელსაც გავაცნოთ“, - ამბობს ლევან ჩიკვაიძე.
მისივე ინფორმაციით, 2021 წელს დაახლოებით 5000-მდე ბოთლი Charles Rullo გაიყიდა. ახალი ბრენდი წარმატებულია ჰორეკა სექტორში, სადაც 30-მდე რესტორანსა და კაფე-ბარში იყიდება.
რაც შეეხება სამომხმარებლო ბაზარს, ,, ჩაკ რულო“ ერთ-ერთი კარგად გაყიდვადი სასმელია ,,ალკორიუმში“ და უკვე ჰიპერმარკეტების ქსელებშიც - სულ ცოტა ხნის წინ ახალი სასმელი ,,სმარტის“ დახლებზეც გამოჩნდა. ერთი ბოთლი „ჩაკ რულო“ საცალო სექტორში 27-28 ლარად იყიდება.
მარი ჩიტაია