„ჩემი ურთიერთობა სახელმწიფო ბიუჯეტთან განისაზღვრება წელიწადში 95 მილიონით და მე ვისთან უნდა მივიდე სანახავად,“- ამის შესახებ ბიზნესმენმა თემურ ჭყონიამ რადიო „პალიტრასა“ და “პალიტრანიუსის“ გადაცემაში „საქმე“ ბიზნესსა და ხელისუფლებას შორის არსებულ პოლარიზაციაზე საუბრისას განაცხადა.
კერძოდ, მისი თქმით, დღეს ხელისუფლებასა და ბიზნესს შორის პოლარიზაცია არსებობს, თუმცა არიან ადამიანები, ვინც ბიზნესის განვითარებას უწყობენ ხელს. ასეთებად ჭყონიამ დედაქალაქის მერი კახა კალაძე და ეკონომიკის მინისტრი ლევან დავითაშვილი დაასახელა და დასძინა, რომ დანარჩენებთან ურთიერთობა არ აქვს.
წამყვანის კითხვაზე, ჰქონდა თუ არა სურვილი სხვებთან შეხვედრის და ისინი არ შეხვდნენ - ბიზნესმენმა უპასუხა, რომ „როდესაც სახელმწიფო ბიუჯეტში წელიწადში 95 მლნ ლარს იხდი, ვისთან უნდა მივიდე სანახავად“.
„მოკრძალებულ ციფრს დავასახელებ - ჩემი ურთიერთობა სახელმწიფო ბიუჯეტთან განისაზღვრება წელიწადში 95 მილიონით და მე ვისთან უნდა მივიდე სანახავად. როდესაც ბიუჯეტში ვიხდი 95 მილიონს, მე მივიდე კიდევ სანახავად. თუ უნდათ აქეთ მოვიდნენ, თუ არადა მე არ მწყინს, რადგან არის კატეგორია ვისთანაც მაქვს ურთიერთობა და ეს მყოფნის.
არიან ბიზნესმენები, რომლებიც განსაკუთრებულ პატივისცემაში არიან იმის გამო რომ სახელმწიფოსთან ურთიერთობაში არიან, ესეც არაა პრობლემა. ეს ყველგან ხდება. ზოგს უყვარს ბიზნესმენები, ზოგს არა, ეს გემოვნების თემაა და არაა საწყენი, მე საერთოდ არ მაქვს დისკომფორტი ამის გამო,“ - განაცხადა ჭყონიამ გადაცემაში „საქმე“.