„საქართველოს ეროვნული ბანკი ძალიან მაღალი რეპუტაციით სარგებლობს საერთაშორისო ორგანიზაციებში, გვყავს თანამშრომლები რომლებზეც ძალიან დიდი მოთხოვნაა კერძო სექტორში. ვფიქრობ, რომ ამ და სხვა ფაქტორების გათვალისწინებით, ჩემს შემცვლელს ნამდვილად კარგ მემკვიდრეობას ვუტოვებ“, — ამის შესახებ ეროვნული ბანკის პრეზიდენტმა კობა გვენეტაძემ განაცხადა.
გადაცემა „ეკონომიქსში“ საუბრისას გვენეტაძემ ეროვნული ბანკის მომავალ პრეზიდენტს ურჩია, რომ არ მოერიდოს არაპოპულარულ გადაწყვეტილებებს, რომლის გარეშეც მიზნის მიღწევა შეუძლებელია.
„ფინანსური სექტორი არის ჯანსაღი და მყარი, არასაბანკო ფინანსური სექტორი არის მოწესრიგებული და ისეთი რისკები, როგორიც არის მაგალითად პირამიდები, შემცირებულია. ქვეყანამ შეძლო დახმარების მიღება როდესაც ამის საჭიროება იდგა და შესაბამისად ვფიქრობ, რომ დასაწყისი ნამდვილად კარგი ექნება.
ჩემს შემცვლელს ვურჩევ, რომ ყოველთვის საქმის კურსში იყოს, თუ რა ხდება საერთაშორისო ბაზარზე, რომელი პრაქტიკა არის უფრო კარგი და არასოდეს მოერიდოს არაპოპულარული გადაწყვეტილებების მიღებას, რადგან ამის გარეშე, სამწუხაროდ, საშუალოვადიანი და გრძელვადიანი მიზნების მიღწევა შეუძლებელია“, — ამბობს კობა გვენეტაძე.
სამომავლო გეგმებზე საუბრისას კობა გვენეტაძემ აღნიშნა, რომ პოსტის დატოვების შემდეგ მიუხედავად მრავალი შემოთავაზებისა, პირველ ეტაპზე დასვენებას გეგმავს.
„მაქვს რამდენიმე, საკმაოდ კარგი შემოთავაზება, თუმცა მინდა რომ ცოტა ხანი დავისვენო. დაგროვებული მაქვს რამდენიმე წიგნი, რომელიც ძალიან მინდა წავიკითხო“, — აღნიშნა გვენეტაძემ.
2023 წლის 2 მარტს, შვიდწლიანი ხელმძღვანელობის შემდეგ, კობა გვენეტაძე ეროვნული ბანკის პრეზიდენტის პოსტს დატოვებს. გავრცელებული ინფორმაციით, ეროვნული ბანკის პრეზიდენტის პოსტი, შესაძლოა, ეკონომიკის ყოფილმა მინისტრმა, ნათია თურნავამ დაიკავოს.