ჭიათურის მულტიფუნქციურ ცენტრს და საქართველოს განახლებადი ენერგიის განვითარების ასოციაციას (GREDA) შორის ხელი მოეწერა ურთიერთთანამშრომლობის მემორამდუმს, რომლის მიხედვითაც ორგანიზაციები ერთობლივად შეუწყობენ ხელს რეგიონში განახლებადი ენერგიის დარგში არსებული პროფესიების პოპულარიზებასა და პროფესიული განათლების განვითარებას.
ახალი სასწავლო წლიდან, ჭიათურის მულტიფუნქციური ცენტრი დაიწყებს ახალგაზრდების მიღებას პროფესიული განათლების კურსზე „მზის ფოტოელექტრული სისტემების მონტაჟი“.

კურსის მსმენელები ხუთი თვის მანძილზე მზის ფოტოელექტრული სისტემების მემონტაჟის პროფესიას დაეუფლებიან. კურსდამთავრებულები შეძლებენ მზის ფოტოელექტრული სისტემების დაპროექტებას, მონტაჟსა და ექსპლუატაციას. დამატებით, მსმენელები გაივლიან თეორიულ კურსებს განახლებადი ენერგიისა და გარემოსდაცვით საკითხებზე.
„ასოციაცია GREDA-სთან თანამშრომლობა გვაძლევს შესაძლებლობას, ბენეფიციარებს, ჭიათურიდან და ზესტაფონიდან, შევასწავლოთ, ფოტოელექტრული სისტემების მემონტაჟის პროფესია, რომელიც მომავლის პროფესიაა და მისი განვითარება სახელმწიფო თუ კერძო სექტორისთვის თანაბრად მნიშვნელოვანია,“ განაცხადა ჭიათურის მულტიფუნქციური ცენტრის დირექტორმა ნატალია პატარიძემ.

„მზის ფოტოელექტრული სისტემების მემონტაჟე ამჟამად ერთ-ერთი ყველაზე მოთხოვნადი და ამავდროულად დეფიციტური სპეციალობაა ჩვენს სექტორსა და ზოგადად ქვეყანაშიც. შინამეურნეობებსა და კომერციულ ობიექტებზე დამონტაჟებული მზის ელექტროსადგურების რაოდენობამ ბოლო ხუთი წლის განმავლობაში მკვეთრად იმატა. დანამდვილებით შეგვიძლია, ვთქვათ, რომ არსებული მოთხოვნა მომავალში კიდევ უფრო გაიზრდება. აღსანიშნავია ისიც, რომ საქართველოს ჯერ კიდევ წინ აქვს მზის მსხვილი ელექტროსადგურების აშენება. რამდენიმე ასეთი სადგური გეგმებში აქვს როგორც კერძო სექტორს, ასევე სახელმწიფოს. პროფესიას, რომელსაც ჩვენი და ჭიათურის მულტიფუნქციური ცენტრის თანამშრომლობის შედეგად ახალგაზრდები შეისწავლიან, თამამად შეგვიძლია, ვუწუდოთ მომავლის პროფესია“, - აცხადებს GREDA-ს სამეთვალყურეო საბჭოს თავმჯდომარე გიორგი აბრამიშვილი.
ჭიათურის მულტიფუნქციური ცენტრი კომპანია “ჯორჯიან მანგანეზის” მხარდაჭერით შექმნილი საგანმანათლებლო პლატფორმაა. ცენტრი ადგილობრივი ახალგაზრდებისთვის შეიქმნა და მიზნად ისახავს, როგორც საზოგადოებრივ ცხოვრებაში მათი ჩართულობის გააქტიურებას, ასევე შრომით ბაზარზე ეფექტურ ინტეგრაციაში დახმარებას. პროექტებზე რეგისტრაცია სრულიად უფასოდ შეუძლიათ ჭიათურის და ზესტაფონის მუნიციპალიტეტებში მცხოვრებ ახალგაზრდებს. კურსების განმავლობაში საფუძვლიანად შეისწავლიან სასურველ სფეროს, რის შემდეგაც უკვე დამოუკიდებლად შეეძლებათ საკუთარი თავის განვითარება შერჩეული მიმართულებით.

(R)