როდესაც რუსეთი რაკეტის დარტყმით ანადგურებს კოსმოსში განლაგებულ თანამგზავრს, ან ჩინეთი ახალ ზებგერით რაკეტას ცდის, შეიარაღებათა რბოლა, რომელიც მიმდინარეობს დედამიწის ორბიტაზე, მას-მედიაში ახალი ამბების თემა ხდება, თუმცა, ამ აშკარა ფაქტების და ფართო საზოგადოების ყურადღების მიღმა, აშშ და მისი მოწინააღმდეგეები ერთმანეთს კოსმოსში ყოველდღიურად ებრძვიან. სანამ ვაშინგტონის ოფიციალური პირები და ექსპერტები გაზრდილ საფრთხეებზე საუბრობენ, მოწინააღმდეგეები ამერიკულ თანამგზავრებს თითქმის ყოველდღე უტევენ.

კონფლიქტის ინტენსიურობა იზრდება და განსაკუთრებით საყურადღებოა ჩინეთი, რომელიც ათწლეულის ბოლოს კოსმოსში პირველ სახელმწიფოდ გადაქცევას და ამერიკისთვის ამ კუთხით ლიდერობის წართმევას გეგმავს.

აშშ-ის კოსმოსური ძალების უფროსის მოადგილის დევიდ ტომპსონის თქმით, დღეს სიტუაცია იქამდე მივიდა, რომ ამერიკის კოსმოსური სისტემები ყოველდღე საფრთხის ქვეშ არიან. რადგან რუსები და ჩინელები მათ ლაზერების, რადიოსიხშირული ხარვეზებით და კიბერთავდასხმებით უტევენ.

„განსაკუთრებით სწრაფად ვითარდება ჩინეთი, რომელიც რუსეთს უსწრებს, და კოსმოსში ოპერატიულ სისტემებს წარმოუდგენელი სიჩქარით ათავსებს. დღეს ჩინელები უკვე მუშაობენ სპეციალური რობოტის შექმნაზე, რომელიც ნებისმიერი თანამგზავრის ხელში ჩაგდებას შეძლებს“ - ამბობს ტომპსონი.

მისი თქმით, რუსეთმა 2019 წელს ორბიტაზე პატარა თანამგზავრი ამერიკულ თანამგზავრთან ისე ახლოს განათავსა, რომ ვაშინგტონში შეტევას ელოდნენ, თუმცა რამდენიმე წუთში რუსულმა აპარატმა უსაფრთხო მანძილზე გადაინაცვლა და იარაღის ცდები ჩაატარა.

„ის ძალიან ახლო მანძილზე მანევრირებდა, საფრთხეს ქმნიდა და ჩვენს თანამგზავრს ძალიან სარისკო მანძილზე მოუახლოვდა. სრულიად აშკარაა, რომ რუსებმა ამით ჩვენ გარკვეული სიგნალი გაგვიგზავნეს,“ - დარწმუნებულია ტომპსონი.

ჩინეთი საკუთარ გლობალურ სანავიგაციო კოსმოსურ სისტემას ქმნის, თანაც პეკინი ორბიტაზე 200-ზე მეტ სადაზვერვო თანამგზავრს უკვე ფლობს.

„ჩინეთი კოსმოსში თანამგზავრებს 2-ჯერ სწრაფად ათავსებს, ვიდრე აშშ და თუ ასე გაგრძელდა, რამდენიმე წელიწადში პეკინი კოსმოსური ძალების კუთხით შტატებს გაუსწრებს. რა თქმა უნდა, დღეს ჩვენ მსოფლიოში საუკეთესოები ვართ, მათ შორის, პოტენციალის თვალსაზრისითაც, თუმცა ჩინელები სწრაფად გვიახლოვდებიან  და თუ ჩვენ არაფერი არ მოვიმოქმედეთ, ათწლეულის ბოლოს გაგვასწრებენ“ - ამბობს აშშ-ს კოსმოსური ძალების სარდლის მოადგილე.

ამერიკელი სამხედროები კოსმოსური საშუალებების შესყიდვის და განთავსების პროცედურის დაჩქარებას ცდილობენ, რისთვისაც სპეციალური სტრუქტურა, - კოსმოსური საშუალებების დაჩქარებული დამუშავების, წარმოების და განთავსების სამმართველო (Space Rapid Capabilities Office) და კოსმოსური განვითარების სააგენტო,  შეიქმნა.

ტომპსონი მიიჩნევს, რომ კოსმოსური სისტემების მდგრადობისთვის საჭიროა ორბიტაზე დიდი რაოდენობით, შედარებით იაფფასიანი, თანამგზავრების განთავსება, რაც შეტევებისგან მეტ დაცულობას უზრუნველყოფს.

„უსაფრთხოებისადმი ტრადიციული მიდგომა, რომელიც გამოიყენება დედამიწაზე, კოსმოსისთვის მიუღებელია, ამიტომაც უნდა შეიქმნას ახალი ნორმები და დოქტრინები და ეს არა მეცნიერების, არამედ დიპლომატების სამუშაოა. თუმცა, ამას წლები დასჭირდება, მდგომარეობა კი დღეს და აქ იძაბება“, - ამბობს დევიდ ტომპსონი.

სანამ დიპლომატები და სამხედროები გზას ეძებენ, კოსმოსური შეიარაღების რბოლა-ბრძოლა ტემპებს იკრეფს და თუ ამერიკა ამ რეალობას არ აღიარებს, შესაძლოა მან ეს ბრძოლა წააგოს.

ავტორი: თენგიზ აბლოთია

წყარო: Washington post