“გახდება ჩინეთი რუსეთის ეკონომიკური მაშველი რგოლი?“ ამ სათაურით გამოცემა ალ ჯაზირა აქვეყნებს სტატიას, სადაც აღნიშნავს, რომ პეკინს საერთაშორისო ზეწოლის განეიტრალების ძალა აღმოაჩნდა.

ჩინეთი ანტირუსული განცხადებებით არასდროს გამოირჩეოდა, ბოლო პერიოდში კი ორი ქვეყნის შეთანხმებით მოქმედება უფრო თვალსაჩინო გახდა. უკრაინის საზრებთან ჯარის მიყენება პუტინმა 3 თვის წინ დაიწყო, თუმცა ღიად მხოლოდ თებერვლის ბოლოს შეიჭრა, თავიდანვე გავრცელდა ინფორმაცია, რომლის თანახმადაც ჩინეთის პრეზიდენტმა სი ძინ პინმა პუტინს სთხოვა 20 თებერვლამდე, ანუ პეკინის ზამთრის ოლიმპიური თამაშების დასრულებამდე, ინტერვენცია არ განეხორციელებინა. როგორც ჩანს პუტინმა ჩინელი კოლეგის რეკომენდაცია მართლაც გაითვალისწინა. მან მის მიერვე ოკუპირებული უკრაინის ორი ოლქის ე.წ. დამოუკიდებლობა ოლიმპიადის დასრულებიდან მეორე დღეს - 21 თებერვალს აღირა, ომი კი 24 თებერვალს დაიწყო.

ჩინეთის საგარეო უწყების ოფიციალურმა წარმომადგენელმა ჩუნინმა განაცხადა, რომ ფაქტს „შეჭრა“ დასავლეთმა ნაადრევად უწოდა, ჩინეთი კი „დასკვნების გამოტანას არ იჩქარებს.“ თუმცა აუჩქარებლად აშშ „ცეცხლის გაღვივებაში“ მაინც დაადანაშაულა. ჩუნინს არაფერი უთქვამს იმისი შესახებ თუ რატომ დაარღვია იმავე დღეს 9 ჩინურმა გამანადგურებელმა ტაივანის საჰაერო სივრცე.

ჩინეთს „მაშველი რგოლი“ პირველად ავსტრალიის პრემიერ-მინისტრმა სკოტ მორისონმა უწოდა, რომელიც მაშინ დაეხმარა აგრესორს, როდესაც ის სხვა სახელმწიფოში შეიჭრა.

ოლიმპიადის გახსნამდე პუტინი პეკინში სი ძინ პინს შეხვდა. შეხვედრის შემდეგ ერთობლივ კონფერენციაზე პრეზიდენტებმა განაცხადეს რომ ორ ქვეყანას შორის მეგობრობას საზღვარი არ აქვს და თანამშრომლობისთვის აკრძალული სფეროები არ არსებობს.

ჩინეთსა და რუსეთს შორის სავაჭრო ბრუნვა $100 მლრდ-ს აჭარბებს. მხარეები ძირითადად ენერგორესურსებით ვაჭრობენ. ბოლო შეთანხმება რომელიც 30 წლის ვადით რუსული გაზის ჩინეთისთვის მიწოდებას ითვალისწინებს თებერვალში გაფორმდა.

რუსეთის მიერ უკრაინაში შეჭრის შემდეგ ევროკავშირმა, ბრიტანეთმა და შეერთებულმა შტატებმა, ასევე იაპონიამ და კანადამ რუსეთს გარკვეული ტიპის, თუმცა არც ისე ძლიერი სანქციები დაუწესეს, ჩინეთი მათ არ შეერთებია. საერთაშორისო გადარიცხვების სისტემის - SWIFT-ის, სანავიგაციო სისტემის GPS-ის, საძიებო სისტემის GOOGLE-ის, საგადახდო სისტემის VIZA, MASTERCARD, AMEX-ის მეტ-ნაკლებად მიმსგავსებული ანალოგი ჩინეთს უკვე გააჩნია, გარკვეულ დონემდე მოსალოდნელი სანქციების გათვალისწინებით ბოლო წლებში მსგავსი სისტემები რუსეთმაც განავითარა, მაღალი ალბათობით რუსეთზე ზეწოლის გაძლიერების შემთხვევაში რუსეთ-ჩინეთის თანამშრომლობა გაფართოვდება.