ჩინეთში კოვიდშემთხვევების მორიგი ტალღის შედეგად უცხოელმა ბიზნესმენებმა საწარმოები შესაძლოა, ინდოეთში გადაიტანონ. დასავლური კომპანიების ზოგიერთ ქარხანას თანამშრომლების დეფიციტი და წარმოების გრაფიკის დარღვევა ემუქრება. ამის შესახებ ბრიტანული გაზეთი, Financial Times გამოკითხულ ექსპერტებზე დაყრდნობით წერს.
კერძოდ, პანდემიის გავრცელებამ ჩინეთში საფრთხე შეუქმნა ამერიკული კომპანია Apple-ის პროდუქციის საწარმოების მუშაობას. მანამდე სააგენტო Bloomberg შვეიცარიის უმსხვილესი ბანკის, UBS-ის ანალიტიკოსებზე დაყრდნობით წერდა, რომ წელს iPhone 14 სერიის სმარტფონების წარმოება შესაძლოა, 16 მილიონი ერთეულით შემცირდეს, რისი მიზეზიც ჩჟენჩჟოუში საკარანტინო ზომების შემოღებაა. ანალიტიკოსები ვარაუდობენ, რომ 2021 წელთან შედარებით, წელს iPhone-ის წარმოება 20%-ით შემცირდება.
Financial Times ინდური ანალიტიკური კომპანია CyberMedia Research-ის ექსპერტ პრაბხუ რამას ციტირებს, რომლის ცნობითაც ამჟამად iPhone-ის სმარტფონების, დაახლოებით, 7-8% ინდოეთში ეწყობა. თუმცა ტაივანის უმსხვილესმა მიმწოდებლებმა, მათ შორის Foxconn-მა, დაისახეს მიზანი, რომ 2024 წლისთვის ეს მაჩვენებელი 18%-მდე გაიზარდოს, რათა ჩინურ ქარხნებზე დამოკიდებულება შემცირდეს. ამერიკული კვლევითი ჯგუფის, Resilinc-ის ხელმძღვანელი, ბინდია ვაკილი აცხადებს, რომ ჩინეთში კოვიდის გამო დისტრიბუციის, ლოგისტიკისა და სატრანსპორტო ჯაჭვები შეფერხდება, რაც შემდგომ ტექნოლოგიური პროდუქტების წარმოებასა და გლობალურ გაყიდვაზე გავლენას მოახდენს.
გაზეთის მონაცემებით, iPhone-ების 90%-ზე მეტი ჩინეთში არის აწყობილი. ამასთან, ცნობილია, რომ სამხრეთკორეულმა კომპანია Samsung Electronics-მა ჩინეთი 2019 წელს დატოვა და თავის პროდუქციას ამჟამად სხვა ქვეყნებში, მათ შორის ვიეტნამში აწყობს.
გუშინ ჩინურმა საინფორმაციო პორტალმა, „გუანჩაჩჟემ“ სამედიცინო ექსპერტებზე დაყრდნობით დაწერა, რომ ამ თვეში COVID-19-ით პეკინელების, დაახლოებით, ნახევარი დაავადდა. დეკემბერში ჩინეთის ხელისუფლებამ COVID-ის საწინააღმდეგო შეზღუდვები საგრძნობლად შეამსუბუქა, რის შემდეგაც ქვეყანა კორონავირუსით მასიურ ინფიცირებას განიცდის. ამასთან, ინფიცირებულთა უმეტესობა სახლში მკურნალობს და ოფიციალურ სტატისტიკაში არ ფიქსირდება. Financial Times-მა ჩინეთის სამედიცინო სამთავრობო სტრუქტურების დახურული ანგარიში მოიპოვა, რომლის მიხედვითაც ქვეყანაში დეკემბრის დასაწყისიდან კორონავირუსით, დაახლოებით, 250 მილიონი ადამიანი, ანუ მოსახლეობის 18% დაინფიცირდა.