ქართველი იმპორტიორები ჩინეთიდან ნედლეულის იმპორტის გაძვირებას მთავარ პრობლემად მიიჩნევენ, რის გამოც ბიზნესს ხარჯი არნახულად ეზრდება. „ისთ გეით ჯგუფის“ სამეთვალყურეო საბჭოს თავმჯდომარე ირაკლი იაშვილი ამ პროცესს პანდემიური პერიოდის მთავარ გამოწვევად მიიჩნევს და აცხადებს, რომ საშიში ვირუსის გავრცელებამ და მასთან დაკავშირებულმა საკითხებმა გლობალური ვაჭრობა თავდაყირა დააყენა, რაშიც ბიზნესი იჩყლიტება.
„ბოლო 1 წლის განმავლობაში ჩინეთიდან იმპორტი ძალიან არის გაძვირებული. ამ ინდუსტრიას წარმოავადგენ და ვიცი, რა მდგომარეობაცაა. იმპორტის ხარჯი, მინიმუმ, 5-6-ჯერ გაზრდილია. ვთქვათ, კონტეინერის შემოტანა თუ ღირდა 3000 დოლარი, ახლა 14 000 დოლარზე ავარდა ღირებულება და ვერც იშოვი იმ კონტეინერს, სერიოზული პრობლემაა. პანდემიამდე ჩინეთზე იყო დამოკიდებული მსოფლიოს უმეტესი ქვეყანა, ხოლო პანდემიისას ამ სახელმწიფოშიც შემცირდა წარმოება, საზღვაო ხაზებმა სერვისები შეამცირეს. უცებ გაიზარდა წარმოება და საზღვაო ხაზებმა არ აღადგინეს სტატუს-კვო, შესაბამისად, ხელოვნურად არის მოთხოვნა ავარდნილი. ალბათ დროთა განმავლობაში დარეგულირდება, თუმცა საზღვაო ხაზებს ეს მდგომარეობა აწყობთ, კოლოსალურ მოგებაზე გადიან. ასეთ სიტუაციაში ტვირთმფლობელები და იმპორტიორები იჭყლიტებიან. კორონავიურუსმა მთელი გლობალური ვაჭრობა თავდაყირა დააყენა“, - აცხადებს „კომერსანტთან“ საუბარში იაშვილი.
მისი თქმით, დიდწილად ამ პროცესს უკავშირდება საქართველოს საგარეო ვაჭრობაში მიმდინარე ტენდენცია იმპორტის შემცირებასთან დაკავშირებით, რაც შეიძლება ქვეყანამ სათავისოდაც გამოიყენოს და წარმოების ზრდას შეუწყონ ხელი.
„გლობალურ ბაზრებზე ცვლილებაა. მოხდა ისე, რომ ფეროშენადნობებზე მოთხოვნა არნახულად გაიზარდა. რა ლოგიკით, არავინ იცის, რაღაც ინდუსტრიებს პრობლემა აქვთ და კოტრდებიან, რაღაც ინდუსტრიები განვითარების პიკს აღწევენ, სრული ქაოსია. ზოგადად, მოხმარება დაცემულია საქართველოში, ფული შეუმცირდა ხალხს, გლობალურ პრობლემებში ვართ. იმპორტი ხელოვნურად მცირდება. ნაკლების ყიდვა დაიწყეს, ამიტომ მიმდინარე ანგარიშის სხვაობა, სალდო მცირდება, ექსპორტი მატულობს. „აწარმოე საქართველოში“ და სხვა პროგრამები ხელს უწყობენ, რომ წარმოება გაიზარდოს. ეს ეხება კვერცხის ბიზნესს, ეს პროდუქტი დღესდღეობით თითქმის არ შემოდის საქართველოში, რაც ჯერჯერობით კარგი პროცესია ადგილობრივი წარმოებისთვის. მთავარია ტრენდი შევინარჩუნოთ, რათა ექსპორტის მეტი შესაძლებლობა გვქონდეს. ეს უნდა იყოს სტრატეგიული ამოცანა საქართველოსთვის, რასაც როგორმე უნდა მივაღწიოთ გრძელვადიან პერიოდში“, - აცხადებს ირაკლი იაშვილი.
შეგახსენებთ, რომ ჩინეთიდან იმპორტის პრბლემასთან დაკავშირებით საუბრობდა ცოტა ხნის წინ შესაფუთი მასალების მწარმოებელი კომპანია „გრინპაკის“ დამფუძნებელი პაატა აბრამია. ბიზნესმენი აცხადებდა, რომ 900%-ით გაძვირდა ნედლეულის იმპორტი, რის გამოც კომპანია ბაზრის დივერსიფიცირებას გეგმავს.
სტატისტიკის ეროვნული სამსახურის ცნობით, უმსხვილესი საექსპორტო სამეულში პირველ ადგილს ჩინეთი იკავებს 370.5 მლნ. აშშ დოლარით, რაც შეეხება იმპორტს, მესამე პოზიციაზეა თურქეთისა და რუსეთის შემდეგ. ჩინეთიდან იმპორტმა აღნიშნულ პერიოდში 459.4 მლნ. აშშ დოლარი შეადგინა.
მარი ჩიტაია