შანხაიში მოქალაქეებს COVID-19-ის საწინააღმდეგო ვაქცინას სთავაზობენ, რომელსაც აირის სახე აქვს და პირით უნდა შეისუნთქო. ახალ ვაქცინას ბუსტერის სახით უფასოდ გაუკეთებენ მათ, ვისაც ინიექციური აცრები უკვე ჩატარებული აქვთ.

ადგილობრივი მედიის მიერ გავრცელებულ ვიდეოში ჩანს, რომ ადამიანები ვაქცინას ჭიქიდან მილის მეშვეობით ისუნთქავენ. ვაქცინის ნელა ჩასუნთქვის შემდეგ აუცილებელია, რომ სუნთქვა ხუთი წამით შეიკავოთ. მთელი პროცედურა 20 წამი გრძელდება.

„ისეთი შეგრძნება მქონდა, თითქოს რძიანი ჩაი დავლიე. როცა ჩავისუნთქე, ტკბილი გემო ვიგრძენი“ - იხსენებს შანხაის ერთ-ერთი მცხოვრები ვაქცინაციის შემდეგ.

ჩინური ვაქცინაციის მარეგულირებელმა ორგანომ შესასუნთქი ვაქცინა სექტემბერში დაამტკიცა, როგორც ბუსტერ-დოზა. ახალი ვაქცინა ჩინურმა ბიოფარმაცევტულმა კომპანიამ Cansino Biologics Inc-მა შექმნა, როგორც მათი ვაქცინის აეროზოლ-ვერსია. ის კლინიკურად გამოცდილია ჩინეთში, უნგრეთში, პაკისტანში, მალაიზიაში, არგენტინასა და მექსიკაში.

მოამზადა მაკა ბიბილაშვილმა