ჩინური კომპანიების კაპიტალიზაცია ბოლო 1 თვეში ორნიშნა პროცენტული მაჩვენებლით შემცირდა.  რუსული კოლაფსის სცენარის გამეორების ალბათობა თითქმის არ არსებობს, მაგრამ ვარდნა მაინც თვალში საცემია.

ჩინური უმსხვილესი ონლაინ საცალო მოვაჭრე კომპანიის Alibaba-ს კაპიტალიზაცია ბოლო 1 თვეში 23.5%-ით $249 მლრდ-მდე შემცირდა, რაც მის ამერიკულ კონკურენტ Amazon-თან შედარებით 6-ჯერ ნაკლებია.

შენჯენში განთავსებულ უმსხვილესმა ტექნოლოგიურმა კონგლომერატმა Tencent-მა, რომელიც კაპიტალიზაციის მიხედვით უმსხვილეს ჩინურ კომპანიად ითვლება ბოლო 30 დღეში ღირებულების 22% დაკარგა და კაპიტალიზაცია $453 მლრდ-მდე შემცირდა.

ჩინეთის ინდუსტრიული ბანკის ICBC-ის აქტივების ღირებულება $4.9 ტრლნ-ს აჭარბებს, რაც მას მსოფლიოში პირველ ადგილს ანიჭებს. მისი აქციების ღირებულება ბოლო 1 თვეში შედარებით მცირედით 4%-ით შემცირდა, ბანკის კაპიტალიზაცია ამჟამად $210 მლრდ-ა.

4%-იანი დანაკარგით გადარჩა ჩინეთის უმსხვილესი ენერგოკომპანია PetroChina-ც. სატელეკომუნიკაციო China Mobile-მ კი ღირებულების 6% დაკარგა. საქართველოში კარგად ნაცნობმა Xiaomi-მ კი 16%-ზე მეტი. რაც შეეხება კომპიუტერული ტექნიკის მწარმოებელ Lenovo-ს მისი აქციების ფასი 11 თებერვლიდან 11 მარტამდე 10.5%-ით შემცირდა.

რუსეთ-უკრაინის ომის გარდა ჩინური კომპანიების აქციების ფასის კლების კიდევ ერთი მიზეზი აშშ-ის ფასიანი ქაღალდებისა და საფონდო ბირჟების მარეგულირებელი კომისიის გადაწყვეტილება გახდა, რომელმაც რამდენიმე ჩინური კომპანია ამერიკული ბირჟიდან მოკვეთა, ყველა გარიცხული კომპანია შედარებით ნაკლებად ცნობილი იყო, თუმცა სიგნალი ნეგატიური აღმოჩნდა.