ქართული ჩირისა და შოკოლადის მწარმოებელ კომპანიას „ჩირიფრუტი“ ქართული შოკოლადის წარმოების დაწყებას გეგმავს - ამის შესახებ „კომერსანტს“ კომპანიის დირექტორმა სოფო ჯიქიამ უთხრა. მისი თქმით, მიმდინარე წელს, კომპანიის წარმომადგენლები შვეიცარიაში იმყოფებოდნენ, სადაც მარცვლეულისგან შოკოლადის წარმოება შეისწავლეს.
„მიმდინარე წელს ჩვენ შვეიცარიაში ვიყავით, სადაც შოკოლადის ექსპერტებს შევხვდით და მარცვლეულისგან შოკოლადის წარმოება შევისწავლეთ. მსგავსი ტიპის წარმოება ადგილობრივი ბიზნესისთვის სიახლე იქნება, ჯერ ეს სამომავლო გეგმაა, დანადგარები გვჭირდება, თუმცა ბაზრისთვის ქართული შოკოლადის წარმოება საინტერესოა“, - აღნიშნა სოფო ჯიქიამ.
რაც შეეხება მიმდინარე წლის გაყიდვებს, ჯიქია ამბობს რომ წელს რა გაყიდვები გაუმჯობესებულია, თუმცა გაძვირებულია ფასებიც, რადგან ნედლეულზე და ენერგომატარებლებზე ფასებმა მოიმატა.
„შარშანდელთან შედარებით გაყიდვები რა თქმა უნდა გაუმჯობესებულია , ფასებს რაც შეეხება აქამდე ფასების დაჭერა მოვახერხეთ, რადგან მარაგები გვქონდა, თუმცა ახლა ახალი მარაგები უნდა შევიძინოთ და გამომდინარე იქიდან, რომ ნედლეული გაძვირებულია ოქტომბრიდან პროდუქციაზე ფასის მომატება დაახლოებით 20% -ით მოგვიწევს.
მისი ინფორმაციით, ამ დროისთვის კომპანიის მიერ წარმოებული პროდუქციის შეძენა თბილისში თბილისში რამდენიმე ადგილზეა შესაძლებელი, ესენია გალერეა თბილისი, duty free, ნიკოლაძეზე საკუთარ მაღაზიაში და ბაზარი ორბელიანზე.