კომპანია „ჩირინა“, რომელიც წარმოებულ პროდუქციას ბაზარზე „ბიუ-ბიუს“ ბრენდით ყიდის, ქათმის ხორცის გადამამუშავებელი ქარხანის მშენებლობას 2022 წელს დაასრულებს. როგორც „კომერსანტს“ კომპანიის ხელმძღვანელმა რევაზ ვაშაკიძე განუცხადა, სართიჭალაში მიმდინარე მშენებლობა აქტიურ ფაზაშია. წარმოება 2021 წლის შემოდგომაზე უნდა დაწყებულიყო, თუმცა საწარმოს გახსნა ერთი წლით გადავადდა. ბიზნესმენი ამბობს, რომ პროექტში საკმაოდ დიდ ინვესტიციას დებს, შედეგად ვაშაკიძეს იმედი აქვს, რომ ახალი ქარხანა „ბიუ-ბიუს“ პროდუქციის გაყიდვებს კიდევ უფრო გაზრდის.
ქვეყანაში შექმნილი რთული ეკონომიკური მდგომარეობის გამო დღეს „ჩირინას“ ქარხანა სრული დატვირთვით არ მუშაობს. რევაზ ვაშაკიძე ამბობს, რომ ქვეყნის ეკონომიკა თუ განვითარდა ორ წელში, კომპანია მაქსიმალურ სიმძლავრეს აითვისებს. ბიზნესმენი ფიქრობს, რომ 2022 წელს ვაქინაციის საკითხი გადაიჭრება, ხოლო 2023 წელს კოვიდ 19 აქტუალური აღარ იქნება.
„პანდემიის პერიოდში მოსახლეობის დიდ ნაწილს შემოსავალი შეუმცირდა, რაც პირდაპირ მოქმედებს კომპანიის გაყიდვებზე. იქიდან გამომდინარე, რომ პროდუქტის რეალიზაცია საქართველოში შემცირდა, „ჩირინამ“ ექსპორტი გაზრდა. 2020 წელს ჩვენ ქარხნის სიმძლავრეები ორჯერ გავზარდეთ, მაგრამ საერთო ეკონომიკური მდგომარეობიდან გამომდინარე ამ მოცულობაზე ვერ გავდივართ. რეალურად შეგვიძლია, რომ ორჯერ მეტი პროდუქტი გავყიდოთ. იმედია, ეს ეკონომიკური მდგომარეობა ქვეყანაში გამოსწორდება და უფრო მეტი საშუალება ექნება მოსახლეობას შეიძინოს ჩვენი პროდუქცია“, - განაცხადა რევაზ ვაშაკიძემ.
კიდევ ერთი საკითხი, რაზეც ბიზნესმენმა „კომერსანტთან“ ისაუბრა, იმპორტირებული ქათმის ხარისხია. აცხადებს, რომ თურქეთიდან შემოსული პროდუქტი არის დაბალი ხარისხის და, შესაბამისად, დაბალი ფასის. რევაზ ვაშაკიძის განმარტებით, იმპორტირებული დაბალი ხარისხის ხორცი უვნებელი არ არის და მაღაზიებში არ უნდა იყიდებოდეს.
„ჩვენ იმპორტის წინააღმდეგი არ ვართ, პირიქით – ბაზარზე იმპორტირებული პროდუქტი აუცილებელია, მაგრამ თურქეთიდან ისე შემოდის ფრინველის ხორცი, რომ საქართველოს კანონმდებლობას ეწინააღმდეგება. ფაქტიურად ქვეყანაში გაუგებარი წარმოშობის ქათამი შემოდის, დაბალი ხარისხის და შიშველ მდგომარეობაში. ისიც კი არ არის ცნობილი, როდისაა დამზადებული. ეს ქართულ წარმოებაზე ძალიან მოქმედებს, რადგან ნებისმიერი ქართული პროდუქტი უფრო ძვირია, ვიდრე იმპორტირებული. ჩემი აზრით, საკითხი სახელმწიფო დონეზე უნდა დარეგულირდეს, უნდა აიკრძალოს ისეთი გაყინული ქათმის შემოტანა, რომელიც არ არის შეფუთული. კომპანიას ამ პრობლემასთან ბრძოლა დამოუკიდებლად არ შეუძლია“, - აცხადებს რევაზ ვაშაკიძე.
ბაჩო ადამია