ქართველმა იმპორტიორებმა ზეთის ბაზრის დივერსიფიცირების მიმართულებით აქტიური მუშაობა დაიწყეს. კომპანია , ,ჩირინას“ ხელმძღვანელი რევაზ ვაშაკიძე, რომელიც პროდუქტის ერთ-ერთი ყველაზე მსხვილი შემომტანია, რუსეთის ბაზრის ალტერნატივად ბულგარეთს განიხილავს, თუმცა დასძენს, რომ პროდუქტის ფასი რადიკალურად შეიცვლება და მინიმუმ, გაორმაგდება.
მიიღე ინფორმაცია უფრო სწრაფად „კომერსანტის“ Telegram-ზე.
ზეთის მოსალოდნელი გაძვირების ძირითად მიზეზად იმპორტიორი ლოგისტიკის გაზრდილ ხარჯს მიიჩნევს. მისი თქმით, არ არის გამორიცხული, დეფიციტი წარმოიშვას, რაც უკვე სახეზეა.
,,ძალიან რთული სიტუაციაა, ევროპა 1 ტონა ზეთს 2700 დოლარად ჰყიდის, როცა ომამდე ეს მაჩვენებელი 1500 დოლამდე მერყეობდა. მართალია, დახლებზე დეფიციტი არ იგრძნობა და ერთი შეხედვით, სტაბილურობაა, მაგრამ წარმოებისთვის ნედლეული სერიოზული პრობლემაა. რუსეთი კვოტირებას აწესებს, მოგვცემს თუ არა, უკვე ესეც საკითხავი გახდა. უკრაინაში ომია და ეს მიმართულება სავაჭრო კავშირისთვის ჩაკეტილია. ამჟამად ყველაზე რეალურად გვესახება ბულგარეთის ბაზარი და ვაწარმოებთ კიდეც მოლაპარაკებას, მაგრამ 2700 დოლარზე ნაკლებად ვერ ვყიდულობთ, ეს კი ადგილობრივ ბაზარზე ზეთის ფასის, მინიმუმ, გაორმაგებას გამოიწვევს. მარტივი ვითარება არ არის, უკვე ევროპასაც უჭირს, გლობალურ ბაზრებზე დიდი გაურკვევლობაა“, - ამბობს ვაშაკიძე ,,კომერსანტთან“.
როგორც ,,ჩირინას“ ხელმძღვანელი აცხადებს, კომპანია ყოველთვიურად 150-170 ტონა ზეთს მოიხმარს.
აღსანიშნავია, რომ ზეთის ღირებულება ბოლო 1 თვის განმავლობაში დაახლოებით 10-15%-ით გაიზარდა.
შეგახსენებთ, რომ რუსეთის სოფლის მეურნეობის სამინისტრო 15 აპრილიდან ოქტომბრის ჩათვლით მზესუმზირას ზეთის ექსპორტზე 1,5 მილიონი ტონის მოცულობის კვოტის დაწესებას აპირებს.
კვოტა მწარმოებლებს შორის გარკვეული პრინციპით გადანაწილდება, ხოლო ზედმეტი მიწოდება 70%-იან გადასახადს დაექვემდებარება, ტონაზე არანაკლებ 1000 დოლარის ფასის შემთხვევაში.
გარდა ამისა, რუსეთის სოფლის მეურნეობის სამინისტრო პირველი აპრილიდან მზესუმზირას საექსპორტო გადასახადის 70%-მდე გაზრდას გეგმავს.
მარი ჩიტაია